Gabayga: Kediso!
Indhowed ka’dii gabay ma tiring, koobna maan darine
Kelmo waaxid waayahan ma oran, kololo deediiye
Kariim mahade kaar cudur ma qabin, mana kadiidyoone
Ma kalaami wayn ee murtida, waan u kaadiyaye
Kol kastaba kis qaataa tirshiyo, kuray carruureede
Goortii kalkeed soo galaan, abid kormeeraaye
Ha yeeshee, xaleytaa kulmiye, kool isoo wacaeye
Wuxuu yiri: Ka toos koorta bixi, waa dareen kulule
Mar kaas baan anoon kayrar gelin, aayar soo kacaye
Dabadeedna kataarkii qabsaday, iyo kabannadydiiye
Kulmis hooya kaafleey kammilan, kaaha iyo layra
(1) Bashiirow kitaab gabay adaa, kaydin jirey waaye
Adigaa qoraa kaabayiyo, koonto u ahaayde
Bal maantana kistaan iga guddoon, igana kowkoobi
Kulammada abwaankiyo dhexgee, kaalinkii golaha
Ka ilaahi kaynbaasyadiyo, dhaqan kutaanleyda
Way karaama dilayaan murtida, koona eegyaduye
Ku sin gabaga kacdoonnada waddani, ee kabaya suuganta
Haddaad kibirto, kedisada adduun, waa ku kicisaaye
Kolba meel ayey kaa riddaa, kaafaf badanleeye
Kohsi iyo dhibaad muujisaa, kahankah quureede
Hadba duul ayaad kababaxyada, koodka jebisaaye
Kulligood Addoomaha ayaad, Jiir ku kama’daaye
Nabaddaad karaahdaa colaad, koora ruxataaye
Nin kaabaanka kuu xoodayaad, laba karbaashtaaye
Kabarrada ayaad kaga muddaa, kaysin warankiiye
Ka kac baa tiraahdaa dhulkii, uu kor soconaayey
Waxaadse kaabadeysoo dulmiga, waayo korisaaba
Midkii aad karaantiil in badan, koomo gelineysey
Kalxamaha mar buu kaaga kabi, maar kuleeyl badane
Haddii muruqu kiilaad ku yahay, eed kadle u roorto
Kun jibbaar miduu kiish yuhuu, kaa kor ridayaaye
Dadoow kaadso aashaa kal soco, kelina hays moodin!
Weligiis ninkay kedo waddaa, waa kurboon jiraye
Kuragii Hitleeyr baad ogtahay, kaalintuu galaye
Kobro duusha, kaaraha waxdila, kolonyo gaadiida
Seeyruuq kun mayl gaarayiyo, miig kaleetinaya
Artaliri kammilin iyo nugnayr, koranto tuureyso
Kuruus dhacaya, kartatooyo iyo, kulli dabbaabaadyo
Kaamirooyin, kaymaha sahmiya, koona gaar hagaya
Kabtan taliye, kornayl koofidheer, jananno kaar qaatay
Kumbad ciidan, kumaandoos kablayn, kaarto iyo weerar
Markii uu intaas kulansadee, aragti koolkoolshey
Kelyo dirir kalsoonida, waa kii sii kallahateeyey
Aadmiga inuu keena suro, kaafirkii damacye
Kashkiisana ma gelin duul kalaa, keebka kuu qabane
Waxse kadabki go’ay maalintuu, kiciyey baaruude
Kob la dhigay, kurtiisii la waa, koonka dunidaan
Haddii muruqu kiilaad ku yahay, eed kadle u roorto
Kun jibaar miduu kiish yuhuu, kaa kor ridayaaye
Dadoow kaadso, aashaa kal soco, kelina hays moodin!
Waarsaba kabeey iibsataa, suuqda koofura’e
Kalaash koof raggiisii wa kaa, kuug maqaayadahe
Kansal la gadhig, aakuhuu kab-kabay, kuunto waynuhuye
Korawashiyiyo Boosniyiyo, Kuubbo iyo Moosko
Xulufadii kubbaysnayd wa taa, kaawo loo dhigaye
Kiyaawaha wa taas lagu furfuray, kaarto Ruushiyo’e
Waa kaas Yugrayn laga kakabin, loona kuurgalaye
Waa kaas sidii kuuligii, kooy la leeyahaye
Baadda kirada waa kaas haddeer, keen la leeyahaye
Waa kaas kor laga eegayaa, kelebya wayntiiye
Haddii muruqu kiilaad ku yahay, eed kadle u roorto
Kun jibaar miduu kiish yuhuu, kaa kor ridayaaye
Dadoow kaadso, aashaa kal soco, kelina hays moodin!
Adigoon kadeed lagugu hayn, aad kakaban wayso
Kooraha fardaha kaariyoow, koowda lama saaro
Kufri iyo Islaam, lama kulmiyo, karah colaadeede
Kufkay ma ihid, rag kulan luguma dhoho, lamana kuur-kuuro
Lama kiciyo, balaayada kambalan, lamana kaaweyo
Lama kariyo, kulaamaha nabsiga, lamana kaydkaydsho
Kaftan iyo cayaar looma dhaho, kelimo liidliid ah
Anaa kana, adaa kaasa iyo faan, lama kabiixo
Kacdin hore, kubbadda guusha timid, laguma kaaftoomo
Kaambiyoon wax baa loo dhigaa, soo kaarar celine
Inay koorno kugu laabataa, kaatib la arkaaye
Haddii muruqu kiilaad ku yahay, eed kadle u roorto
Kun jibaar miduu kiish yuhuu, kaa kor ridayaaye
Dadoow kaadso, aashaa kal soco, kelina hays moodin!
Afartaa sidii dayax kubbaxa, kaah ma ku caddeeyey
Kayse-keyse roobiyo sidii karar, ma soo daadshey
Ma kutubiyey, koorsooyin gabay, kaafna ma hikaadshey
Ma kasbeeyey, bayd gaabku waa, karid habaabaaye
Kumbaddii Cabdille Tarawal iyo, kayd ma soo bixiyey
Kulan iyo sidii Faarax iyo, Khayrre ma u kaabay
Ka’dii Raage, karooskii Qamaan, kaafidii Hadraawi
Sida kaamishii ina Suldaan, KEDIS ma faallooday
Afar kalena aan kala baxshoo kariyo taariikhda
Soomaali waxa kuurbadiyo, kayn ku kala ooday
Oo beladu uga kici la’dahay, maydin kadabsiiyo?
Kaahin feleg, kulhaan kowshad faal, sixir Ibliis keenay
Kud iyo kaar, dhukaan kuudadshiyo, koolbo uu galiyey
Kulligeed kolkii uu ku dhacay, bay kadaalidaye
Dabadeed kasxumo waallidii, waxay kalaam dodday;
Kur iyo buuro, karkoorkiyo bankiyo, kaxo-kaxooleyda
Kob bannaan kariiriga dushiyo, kaalimmada xeebta
Keli webiga kaadkiisa iyo, boqol kannaalleyda
Dhirta komoshka laga soo gurtiyo, kaabadaha beerta
Waa kashkaashyadii aan lahayn, taniyo Koosfaare
Waa Koofil meeshuu ku mudey, kuud calaamada’e
Waana ciiddi reer Kaarshe iyo bah ina kuukaaye
Inay maanta soo kuudadaan, koror rag doonahaya
Oo ay kabaannada dhigtaan, waa karaam li’iye
Kacoo hooya kuuryaamadiyo, kayb wax laga taabto
Kurta gooya, reer Kediye Cali, kaad ka aragtaanba
Ku kawiya intaad kari kartaan, maar la kululeeyey
Dumarkiyo carRuurtana kambala, oo kelyaha dooxa
Ku kabdhooda kulLigood runtii, waa kufaar cadawe
Soo kaxaysta koromMada rarkiyo, kadimadii geela
Ariga kaale soo dhaha, lo’dana, gebigeed soo kiisa
Duulba kaalka waabaayadaa, maalmo soo kariye
Dabadeedna kii kale kursada, kaalintiis bogaye
Ilaa saaka labo kawtankaas baa, la kudayaaye
Kashifkiyo wareerkuna sidii, buu u kow yahaye
Kasina waaye karaamada midnimo, kala tag mooyaane!
Kaafka xiga kawaawida labaad, maydin kadabsiiyo
Kursi taliska kabo hirigtankaa, layska koran waaga
Ka degtiyo anaa kali ahaan, abid kulaalahaya
Kala baxa qabiil kaalaydiyo, iiga kiciyaayda
Karid iyo karkabo loollankiyo, kaadsi kari waaga
Ku dil iyo, dagaal ka baxtankiyo, duullan kaba siibka
Konton duugga, kun xabaaliddiyo, qolo karantiilka
Nimba kaalka waabaayadaa maalmo, soo kariye
Dabadeedna kii kale kablaha, soo karaar orodye
Ilaa saaka labo kawtankaas baa, la kudayaaye
Kashifkiyo wareerkuna sidii, buu u kow yahaye
Kasina waaye karaammada midnimo, kala tag mooyaane!
Kaafka xiga kasxumadeeda kale, maydin kadabsiiyo
Qaliil baa la kaam-kaamayaa, loo kadlinayaaye
Qaranbaa kur laga tuurayaa, kayle loo qodiye
Nin dantiis kadaaliyey, ayaa lala kurboodaaye
Markuu kalaxa waabaay u daro, ee kebbiyo maarta
Ee kooxo laayee kumaan, barakac kaynaansho
Ayaa kaalmo laga raadiyaa, belada kii keenay!
Waxba gabagu yuu ila kicine, waxan ku soo koobay
Kal iyo laab haddaan daacadnimo, samaha loo koodin
Oo aan siqiir iyo kabiir, loo kallihin QARANKA
Qof waliba intuu karo, intuu kaabi karo khayrka
Haddii uusan kubbayn iyo dawaba, kaalintiis gudannin
Oo aan karaankuraha jaban, kabidda loo toosin
Way koora badisaye haddaan, meel laysugu keenin
Oo aan Korow KALIGITALIS, kadinka loo diidin
Oo aan ninkii kaafin kara, talada loo kaadin
Oo aan kalsoonida la siin, kii kasbada GUUSHA
Soomaliyey kifaax nabad ha sugin, iyo wanaag kaaha!
Dhammaad
16/07/2015
(1) Bashiir M. Xersi
Curiye:
Maxamad Faarax Xuseen
