Maansadda Sir gemboon 
Maansadda, waxaa la yiraahdaa, “Sirgemboon” Maansaddan waxaan igu dhaliyey curinteeda, inaad raadraac ku sameeyo, sababihii dhaliyey burburka iyo dhibaatada jirta, aas aaskeeda, anigoo bidhaaminaya, meelaha aan is leeyahay waa laga daarey, haddaba aqriste adigoo heli doono, dulucda waxaad ka heli doontaa dhexdeeda., bogasho wacan:
Shaxdu Waa ga’a leeydii
Nin godlani furfuri jiray
God ka furan shilbaa xiga
Waa daamo geesuhu
Haddii guul lagaa helay
Ameey guda xanibantahay
Inaad gurato Waa daw.
Gudbay Oo Haddana raray
Weli geediyaan ahay.
Gocoshada dareenka leh
Wuxuu maan ku guuxaba
Waxaan guda ku heeystoon
Afka gebi ka saaraba
Caawaa shinkii galay.
Nin ugaar genaayaa
Gebgebtuu ka dhoowraa
Hadba gaatin Socod iyo
Wuxuu geed ku dherersado
Gumacuu la helayaa
Aniguna gedaasaan
Gaangaabiyaayoo
Haadiyo gariirkaan
Gembisada ku sabayaa.
Haruurkiyo galeeydaan
Hadba gees u dhigayaa
Xeesheeydu Waa gaar.
Gorgor baan dirsanayaa
Isagaan go’dooniyo
Garbahoo cuslaadiyo
Gaajiyo haraad iyo
Sina daal ku gaarine
Gudbay Oo Haddana raray
Weli geediyaan ahay.
Gor gor yahoow farriintiyo
Oraahdeeydan gaarka ah
Gunud weeye ee qabo.
Fulay Waa gediisee
Intaad fuusho geedaha
Guradooda how tiring.
Ganuun weeye xoor lehe
Gobol gobol u gaarsii
Guryahoodad ugu gee
Ku garaac albaabada
Ka qudbeey gidaarada
Inuu guurtigeeduba
Yahay kii arlada gubay
Geeraarkan ugu sheeg
Gudbay Oo Haddana raray
Weli geediyaan ahay.
Go’i Waa dadkeeygoow
Maxaad geesi liideen
Nacas aad garbeeyseen
Hadba kii go’ Shaaliyo
Sita sabarta giirani
Ma gudoonshihiibaa?
Haddii goodka halista ah
Muska reerka gaardiyo
Ma dhulkaan ka guuraa
Iyana Waa gedaan rabo
Talo gaasa bixinteed.
Go’i Waa dadkeeygoow
Shalay geedigeenii
Sahankii u goobee
Gal xareed leh nagu furay
Oo aan gu’ iyo deyr
Nimco aan guureyn
Ciirtiyo garoorkaba
Gariinkeeyna saarneyd
Waa tuu gadoodee
Yiri weey guracantahay
Xaajadan gar adagta ah
Anigaa gorfeyn kara
Abwaan guuna baan ahay
Waad gama’santiinee
Goofkiinibaa dhacan
Galdaloolo badan iyo
Gaawa buuxsi baa jira.
Guni waa ma hubisee
Durba galawgi aadaar
Gabay baasna loo tiri
Marna saar gunuunaca
Heesaha gurbaanka leh
Xanta leeysku gaarsii
Misna garay nin doorkii
In gadaalu mereg tahay
Gosha bahal kasoo ciyay
Gocor maaha coon ehe
Duqi gogol nabdeed baaq
Ger castiina loo yeer
Loo goowrac oowrkii
Geelaba u weeynaa
Kolki goowska loo dhigay
Miidina la gororsaday
Geesigi la xaajoo
Wefdigii gabbaaraa
Godob iyo manaba sheeg
Yiri mee intaan guday
Ama aan idiin galay
Ma hiishoo gubyootaa?
Wefdigii gondaha laab
Guul darona usoo fooc
Garka iyo salaax timo
Goonyaha la eeg eeg
Hadba kii gol roonaa
Haf lasoo dheh guuleed.
Runi been ma gaartee
Galadaadu waa libin
Hadaladan guracanee
Guudkaaga lagu milay
Ma geeydaan ku leenahay
Gacalnimo u dhalashee
Ina saamax goor uun
Aqbal yiri gudoonshuhu
Gudbay Oo Hadana raray
Weli geediyaan ahay.
Doqonkiyo gudaalihi
Durba xarigi soo goo
Makastiyo gibbaanadi
Gaargaarka loo shiri
Bello leeysku geegaar.
Gumac leeysku eeyfaad
Gaban iyo duq leeys doox
Gabdhihii la kala boob
Geenyada fardood iyo
Geelii la kala qaad
Haddii goodir duuqdana
Danbeetada la sii goo
Wirwirkiyo gubtaanyadi
Gebgebtiyo shalaaytadi
Tusmo laguma goosane
Maantana gedii horre
Ma usoo galiin baa
Gudbay Oo Haddana raray
Weli geediyaan ahay.
Gorgoryahoow u sheego
Gacalka iga gaarsii
Salaadiintaan guuxdaa
Talo gaasir mooyee
Xal inooma gooyaan
Haddii leeys gam siiyana
Gennigooda boow dana
Gorgoryahoow usheego
Gedigoodba gaarsii
Gabayaagaan taahaa
Uubtiyo godkaan qodan
Waa kii inagu guray
Oo Weli guduudane
Ama aar gaboodya leh
Gibilkeeyna hoos dhigay.
Afartaa go’ iyo hirig
Sir gamboodsaneed ebid
Galac iyo ma dhigay doox
Gobtii ay ku idishahay.
Afar kalena gidib iyo
In gunaanadeey haray
Nin kastaba garaadkii
Xeel iyo gun baarkii
Giblo iyo ciyaartii
Mid is gooman riixiyo
Ganta Waan ka sugayaa
Ineey maan ka gocatee
Gujisooy is dhiibtoo
Gondahana is gelisoo
Geeraaro tirisee
Inta gefiyo qalad
Godob qaadan jaallow
Horta garo Qofkaan ahay
Qabiilkeeygu Waa geed
Gumar iyo sarmaan iyo
Dhashi goowlalaan ahay
Cidna gaar ma daaqsado
Gayigaan usimanahay.
Curiye; Cabdiqaadir Ibraahim Weheliye
sandhool-yare@hotmail.com
