Gabay; Hadimmo!
1: Hal abuur abwaan hore ma ihi, Haaya gabaygoo dhan
2: Mase haabto maansuu qof kale, Hawl u galay weyne
3: Calashaan hibaan qaar u helay, Hodan ahaanteeyda
4: Ha yeeshee, waxaa iga hadliyay, Hawsha taal weliye
5: Hub haddaanan qaadeyn afkuba, Hiillo wuu galiye
6: Halkeey maanta joogtaa qalbigu, Ila huraayaaye
7: Iga hooya maantoo kaleey, Hooda leedahaye.
8: Soomaalaay Hal qoys beynu nahay, Kalama hooseynno
9: Isku hooyo baanu wada nihiyo, Lama huraankiiye
10: Hayb qureynu wada sheegannaa, Taniyo Haabiile
11: Hal quraata baan wada nahiyo, Hurin walaala ahe
12: Hadda xaajadaan murugsanee, Hogga ka laalaadda
13: Halka nalaga haystiyo ma garan, Hawsha laga dooni
14: Halhaleel inaan uga baxnana, Waan hamminayaaye
15: Halgankii xornimadee la galay, Ugu horreyntiiba
16: Dowlad horumadhaan noqonnay, Iyo haadda samadaase
17: Afrikada halbowlaan u nahay, Hooyo iyo aabbe
18: Iyaguba hubaashii ogsoon, Haybta Soomaali
19: Iyagoo la heeroo gunnimo, Heeryo lagu waabay
20: Hiillada markaan ugu tagneey, Nabad ku heeseene
21: Abaalkaana kuma haynno oo, Maba is haybshaane
22: Umushuba xanuunkii hayiyo, Hawshii foosheeda
23: Inta ay hilmaamtey haddana, Hanad xambaartaaye
24: Huf noqdooyin saas oo kalaba, Nagama hoos qaadin
25: Hamuuntii markeey daysay bey, Hagar billaabeene
26: Ha yeeshee, dadkeygaa is hodey, Wada halgaadeen
27: Hoosaasin bey nagu wadaan, Wayna hadayaane
28: Inaguna habeen iyo dharaar waan, U hurudnaaye
29: Markay nala hadlaan baan xitaa, Wada hogeynaaye
30: Hashaan wadar ku maaleynay baad, Hanaqa goyseene
31: Geedkaan harsaynnaa barkiin, Hoos ka gooyeene
32: Waxaan horay u jirin baad haddeer, Hadal ku keenteene
33: Arrin kuma heshiisaan talana, Daa ba hadalkeede
34: Abaar baw hayaantaan haddaad, Hogal ujeeddaane
35: Habacsanida dunidoo dhambaad, Uga horreysaane
36: Taariikhda hoos baad gasheen, Una hanweyntiine
37: Been inaanan hooreynin baan, Hadaf rumaadtiiye
38: Hubsadoo dareen bay hayee, Dhuuxa hadalkeyga
39: Dhulkii hooyo cadaw baa hantiyay, Haysta idilkiise
40: Hooy Amxaaro waa kaas noqdiyo, Halaq Ugaandhaysa
41: Hubka laysku laayaa rakiban, Hodan dhulkeenniiye
42: Kulligeen hamuun baan qabnaa, Gaajo hari waaye
43: Waxa hooy islaameed na dhigay, Waa hunguri baase
44: Inaan Doollar soo wada helnaan, Loo hardamayaaye
45: Harka waxaan ka dhiganeyno, Waa gaalo hooskeede
46: Hasaawaha qabiil baan xitaa, Uga hadleeynaaye
47: Dad uu caashaq hayoo jacayl, Horay u soo qaatay
48: Labo isku hanweyn baan niraa, Hayb isugu fiirsha
49: Hebla weeye gabadhuye adiga, Yaa ku huba heedhe?
50: Amasaba hantida uu watiyo, Hooyga uu joogo
51: Xoola aanu hayn baan niraa, Keena hanadkiiye
52: Markay hadaftu taladay hirtee, Kala hagaagaanba
53: Jameeykaanka inantii helee, Heellada u qaada
54: Ninna kama hadlee waalidkeen, Waa hanuu orane
55: Laysma haybsho dabadeed haldhaa, Hoosna laga hiifye
56: Nabsaa soo harsanayee bal dhawr, Hadalka soo yeera
57: Habeennaba gadaashood wadnuhu, Hooda kala gooyay
58: Hoognay iyo baroor bay miciin, Hiigsanaayaane
59: Bal habaar iney wada qabaan, Halis ma dayaane
60: Hirka iyo bad weyn saaray iyo, Lagama hoobtaanka
61: Hadimmada maxaa ugu wacan, Hulalka Shaydaanka
62: Habaaskiyo maxaa ciidda dhigay, Calanka loo hiiqday
63: Habisaa na fuushee hadmaan, Hiigsan danaheenna?.
Waxaa curisay; Hodan Sheikh Cumar
