Maansada: HABLAHEENNA
Hablaheennu waa gobe
Raggii baa hagranayoo
Hayin iyo u noqon hebed.
Hablaheennu waa gobe
Raggaan hiil u gelinoo
La hinjinin canaabaha.
Hablaheennu waa gobe
Rag la hawl galoo wacan
Oo hagaagsan baan jirin.
Hablaheennu waa gobe
Rag hagoo agaasima
Horkacaaya may helin.
Hablaheennu waa gobe
Waa hubqaad itaal lehe
Rag horboodayaan helin.
Hablaheennu waa gobe
Waa hormuudka noloshee
Rag hareer socdaan jirin.
Hablaheennu waa gobe
Rag hilaadin karayoo
Hantiyoo wadaan helin.
Hablaheennu waa gobe
Raggii baa la harayoo
Horseed aan u quurayn.
Hablaheennu waa gobe
Raggii baa hamradayoo
Hor istaaga yoolkood.
Hablaheennu waa gobe
Rag u heello tuma iyo
Nin hab siiya may helin.
Hablaheennu waa gobe
Huuhaa huruuf iyo
Raggaan hiif ka daynayn.
Hablaheennu waa gobe
Haydaariyo hah mooyee
Rag hilow gelshaan helin.
Hablaheennu waa gobe
Raggii baa hafraayoo
Hadalsami ka waayeen.
Hablaheennu waa gobe
Raggii bay hufnaan iyo
Habsamaan ka waayeen.
Hablaheennu waa gobe
Hammigiyo hankoodaba
Raggaa hoos u wada dhiga!
Hablaheennu waa gobe
Huqya hoog waxaa baday
Rag halaag hamuumaya.
Hablaheennu waa gobe
Hoyaad iyo harsimo lehe
Rag ku soo hirtaan jirin.
Hablaheennu waa gobe
Hagbad aan la dhuumane
Rag ayaan hal dhaafayn.
Hablaheennu waa gobe
Raggaa neceb Habboontoo
Hanad wiil ku taamaya.
Hablaheennu waa gobe
Raggii baa hodaayoo
Haadaan ka tuuraya.
Hablaheennu waa gobe
Habacsane hareer ka mar
Hanfadkowna nabad geli
Hablaheennu waa gobe
Ha hujuumin nacas yohow
Ha haraatin doqonoow.
Hablaheennu waa gobe
Ha rafaadin huduryohow
Ha halgaadin hoogoow.
Hablaheennu waa gobe
Waana hooyadaayoo
Horaaddaha ku nuujiday.
Hablaheennu waa gobe
Waana hibo walaashaa
Ku habtoo ku haysaye.
Hablaheennu waa door
Waa afo aad la hoyatiyo
Ilmahaaga habartood.
Hablaheennu waa gobe
Afka aan ku hadalnana
Waa hikaadiyaha dhiga.
Hablaheennu waa gobe
Abaal marin haddiyad iyo
Billad yaa u huray abid?.
Hablaheennu waa gobe
Higsiga han iyo hadaf
Halabuura waligood.
Hablaheennu waa gobe
Hogol roob ah weeyoo
Raggu hoorsan waayeen.
Hablaheennu waa gobe
Raggu uusan huri karin
Misna hayso lagu karin.
Hablaheennu waa gobe
Halhays lagu handada iyo
Horor cagojuglaa dilay.
Hablaheennu waa gobe
Ammaan lagu huwiyo iyo
Hambalyiyo salaan mudan
Hablaheennu waa gobe
Aan hoggaan ka dhigannoo
Hoggaamiye u dooranno.
Hablaheennu waa gobe
Waa haldoorka guushee
War ragow heshiis la gal.
Dhammaad.
02/02/2017
F.G: maadaama maalmihii dacwadda BADDA lagu jiro, maansadan waxaan muquuno uga dhigayaa Dr. Mona Alsharmaawi, oo ka mid ah qareennada difaacaya BADDEENNA. Sidoo kale, waxaan muquuno uga dhigayaa dhammaan hablaha raggu ku noqdeen kuwa leh tilmaamaha maansada ku jira.
