Maansada: Hiil hooyo
Oraahdiyo sheekadeyda
Mabda’a iyo aragtideyda
Ammuurtaan faalladeeda
Ujeeddada maansadaydan
Tixdaan ararteeda suubban
Micnaha asalkeeda duugan
Ammaan hooyoo mugweynle
Udgoon hiilkeeda weeye
Istaag dhinaceeda weeye
Astaahil wixii ah weeye
Ummadda xasuusin weeye
Xaqeeda Allaa caddeeyay
Siduu Aayaad ku sheegay
Axaadiistuna abbaartay
Hooyadu aabbaha ka mudan
Adeecidda waalidkeenna
Iyadaa saddex goor la sheegay.
Afeef weeyee middaani
Aqlaaqiyan kama tagaayo
Anshaxa suugaantu dhawran
Gaf iyo aflagaaddo reebban
Inkaar maahiyo habaar dheh
Runtana ood saari maayo!
Alleylehe ina raggeedse
Anoon ka abaal dhacaynin
Asxaan kii saa tireeynin
Marbana ka il duufihaynin
Runtana ugu aaba yeelin
Dhaliilaha aan indheeyo
Xaqiiqada aan ishaaro
Cabbiro eeddaa dultaalla
Xilkiisa raggaa ilaaway!
Irdaha dunidoo ballaaran
Ifkaan afartiisa gaar day
Waxaa Uumiyaha dhooban
Ilmadu hooyeey ku taallaa
I taal ayadoon lahaynoo
Asaay ayadaa xambaarta
Agoon ubadkeeda weeye!
Ilmaha ayadaa koreeysa
Aroor ayadaa qaxaysa
Urugo ayadaa dareenta
Ummusha ayadaa xanuunsan
Cidlada ayadaa ku oonta
Omosta ayadaa ku daasha
Xaqeed ayadaan arkeynin
Indhuhu ayadeey basaasi
Argaagax ku nool dhexdiisa
Wataa AMISOOM ku dheeshay!
Ayaan darro weeye taasi
Dabkana aabbaa shidaaya
Asaa ukumaha dilaaya
Arlada Eebbana gubaaya
Rasaas ku asqeeya maato
Aqbaar tabinaaya been ah
Dagaalka asaa unkaaya
Abaar ku furaaya reerka
Colaadda asaa asoola
Yiciista asaa argoofa
Madfaca asagaa ridayaa
Baaruudda asaa afuufa!
Inteey ibta nuujisaabay
Misana eeddeed galaaan
Markuu Afo iyo Arooska
Inuu aqal galo rag doono
Ilwaad qurux uu ishaarto
Asaaggeed uga dhex baaqo
Udgoon calmadoo u yeerto
Anshaxa tii lagu barbaarshey
Aqoontiyo diinta Eebbe
Hiddaha dhaqankiyo afkeeda
Markuu sheekada asteeyo
Aroos isagaa ku baaqa
Udgoon ugu waca markaaba
Ammaan ku salaama koow
Markeey ooridi ahaato
Ayaamo markuu la joogo
Axsaab uurkiisa qaaddo
Naa orod aqakiinna aadoo
Abbaayo i dhaaf yiraahda
Jariidka asaa ka eega!
Inkira ubadkaba dhashiisa
Aayaha nolasheeda tuura
Iskeedaba uur xumeeya
Asaaggeed asaa ka reeba
Abaaydin asaa ku tuura
Oheey asagaa jidh diida
Inkaariyo ceeb xambaarta
Arxaan darridana ku caana.
Dhammaad.
Hodan Sheikh Cumar
