Maansada Murugadooda Reer Yurub
Waa maansadii 7AAD, oo ka mid ah silsiladda MIDNIMO. Maansadu waxay si gaar ah u daba socotaa maansooyinka ka horreeyay oo ay curiyeen Saciid Muuse, Cabdiraxiin H. Galayr iyo Bashiir M. Xersi oo ba silsiladda daah furay. Maansadu waxay sii xoojineysaa iftiiminta muhimadda MIDNIMADA, waxayna tiri;
Maansada Murugadooda Reer Yurub
Miimleeyda maansada
Maalmahaan ma faaqidin
Mana gelin ummuurteen
Mana curinin waayahan
Ma mireynin tixaha gabay
Mana muujin geeraan.
Inkastoon Marleey dumar
Marwo sheegan aan ahay
Maansadiyo guurow
Miisaamo weligeey
Ragbaa mucallinkeedaa
Dib haddaan u milicsado
Suugaanta meel sare
Maahmaaho guuniyo
Halxiraalayaal mudan
Milge iyo culaysna leh
Mar haddaanan marineyn
Meeqaamkii Shuuriye (1)
Mucda hadalka geyneyn
Macnihii Abwaan hore
Kuwa maanta joogee
Magacsame Bashiiriyo (2)
Makaankii Galayriyo (3)
Masalkii Ustaadkiyo
Murti wade Saciidiyo (4)
Ragga muhandisiinta ah
Miinleeyda noo furey
Midnimada magac dhabay.
Ragga Meerisyada culus
Galayrbaa mudnaantii
Meeriyoo makaansaday
Anna waa markeeygoo
Marti kama ahaanine
Aan macneeyo saan rabo
Aan maaxdo sida laas
Aan magaabo sida geel
U onkodo sidii mayey
Aan magoole sida geed
Mahad Eebbe furay iyo
Mataan aan go’ayn iyo
Meer meerto weeyaan
Marba waa mid gooniya
Waa farac mugweynoo
Maangalahe iga maqal
Maaddo kalana hooyoo
Maamuuris weeyaan
Hibo Mowle bixiyiyo
Waa Eebbe mahaddiis
Milyan goor Allaa mudan.
Mar haddaan is idhi mari
Godal qaaday maankii
Aamusnaa muddada badan
Mirtii dhexe intaan kacay
Ujeeddada u meel dayay
Fahmay oo macaansaday
Maqsidkana u dhaadhacay
Midnimada miliilicay
Maareyey dhawr jeer
Hadba marin ka joogsadey
Marna lagama maarmaan
Ila noqotey miidaam
Madal lama huraaneed
Marna moos cirkaa jira
Gudcur maaradowda ah
Midig geli god lay yiri
Anna maagay dhawr jeer
Marjacii Silsiladdiyo
Intaas meel markeedii
Oo muuqda weeyaan.
Mid kaleeto hooyoo
Maqsadkii Silsiladdani
Dadku inuu mir qura yahay
Magaca iyo diintiyo
Muuqa iyo aragtida
Muran lagama keenine
Inay kala masoobeen
Kala maahsan yihiin
Heesaha ku mariseen.
Dad mariilay waa hore
Mayday oon waxbaba maqal
Oo marin habaaboo
Masiibadu haleeshoo
Mashaqooyin galabsaday
Lagu maato dunidoo
Maalin weyn is weerarey
Malcamaddii diintiyo
Mawlaciyo Masaajiid
Madaafiicda oloshiyo
Miino ku xirey baas
Dhiig lagula mayrtoo
Middi loo adeegsaday
Madaxiyo gacmaha jaray
Maatiyo carruurtoo
Mooryaan adeegsaday
Mixnaduhu hareeyeen
Keey madax u doortaan
Maamule ka yeeshaan
Keey maal u dhiibtaan
Keey aammin maagaan
Mumin keey u haysteen
Ummadduu madluunshee
Weli macangag mooyee
Maamule haggaagsani
Mayaylkooda qabanoo
Maamuusin sharaftood.
Maansadani baaqiyo
Maareyn xalkoodiyo
Maslaxadda naftoodiyo
Mideyntooda weeyan
Manfacdooda weeyaan
Iyo Muruga Reer Yurub
Afrikada madoow iyo
Waa Mareykan malaggiis.
Intaas waan maquunshee
Mid kaleyto hooyoo
Miir miirta hadalkiyo
Murtidiyo wax dheefkeed
Muudsada bal waatane
Miilankiyo ujeedkiyo
Miraheeda dhuuxoo
Kala miira maankoo
Maraxsada xigteedoo
Manfacsada tarkeedoo
Maldahiyo sarbeebtiyo
Dhugo meeriskeedoo
Manhajkeeda raacoo
Muudmuudso miidoo
Garo meesha aan rabo
Mugdi yaanu kaa gelin
Yaaney moodis kaa noqon.
Rabbi baa Mulkiile ah
Maamula adduunyada
Midka baahan quudshoo
Caafiya mariilkoo
Saaxiya majnuunkana
Maalgaliya qaniyagoo
Midka midigtu marantahay
Saboolkaan midnaba hayn
Isagaa masruufoo
Mawlaa miciin u ah
Wuxuu maalin kuu dhigin
Maalin kuma macaashtaan
Haddaad maagtid doon doon
Magac raadis baa tahay
Nin masayrsan baa tahay
Oo maqane jooga ah
Midigtuba ma taanteed
Bidixdeey ku meelmari
Oo kalama maarmaan
Qofkii meelu go’an tahay
Oo lixaadku maran yahay
Yaa marqaati iiga ah
Adigoo maryaha xiran
Oo murduqani waa ceeb
Maanlaawe iyo tuug
Waa meheraddoodii
Waana lagugu maadtaa
Hebel waa madoobaa
Mara muusan qabin beey
Kuu marshaan bannaannada.
Mar haddaanu shacab jirin
Dadweynuhu mashxaradeyn
Madaxweyne waligiis
Madaxtooyo kama talin
Micnuhu wuxuu yahay
Shacab li’i nin madax raba
Ma dhirtuu u taliniyo
Mawaashigiyo xoolaha
Illeen maba awoodee.
Macne kale wuxuu yahay
Marwadana ninkeediyo
Maqal sawjka lagu yiri
Aabbaha masruufkiyo
Reerka maamulkiisaa
Looga dhigay musuul sare
Haddaan marinka noloshiyo
Maareynta loo jirin
Sida laba mataana ah
Midigta iyo bidixdeed
Reerku magac ma yeesheen
Mooro kuma nagaadeen
Mugdi lagama saareen
Makri lagama waayeen.
Macne kale wuxuu yahay
Haddaan mayey subxeediyo
Miiraale ku onkodin
Mahiigaan biyaha dhigin
Dhirtu miro ma bixiyaan
Manka iyo magool ma leh
Cawska iyo maartiyo
Mayradiyo garagaro
Meelaha ma buuxsheen
Mayleeyda Geeliyo
Maadhiin lo’aadiyo
Miidda iyo dhaydiyo
Gaax lagama maaleen
Subag lagama miireen.
Waxba yaan maquurane
Meermeerin goonyaha
Runta maro masaarnee
Maldahaadda aan dhigo
Micnaheeda aan galo
Maqsidkiyo ujeeddadu
Waa midnimee ma ogtahay
Waa is maamulkeenniyo
Cadawgoon maquunino
Madal loo dhan yahayoo
Maamuus qurxoonoo
Garta madowgu noo furin
Oon Mareykan noo xirin
Muhashadeeda weeyaan
Ummad midab hallawdo
Doorsoomay maankii
Maareynteeda weeyaan
Isku duubni baa mudan
Kala marin habaaw iyo
Ogaaw kala maqnaashuhu
Waa meel ka dhacayaga
Ummad yahay middaa garo
Maankaaga ku adkee
Midnima leh guuliyo
Magacaan gureyn abid
Soomaalaay middaas garo.
Dhammaad.
Hodan Sh. Cumar
(1) Abwaan Faarax Shuuriye, oo ahaa Abwaankii calanka u siday suugaanta Soomaalida siiba tan gobollada dhexe illaa Bari.
(2) Bashiir M. Xersi, oo curiyey maansada MIDNIMO, ee billow u ahayd silsiladdan MIDNIMO.
(3) Cabdiraxiin H. Galayr, oo curiyey silsiladda 3aad ee maansada oo la yiraa; “MIDNIMAA LEH MAAMUUS”.
(4)Saciid Muus, oo curiyey maansada 2aad ee silsiladda MIDNIMO, oo la yiraa; (Leyska dhiib Mareykan)
