Gabayga: GODGODAN
Ga’da maanso, guurowga gabay, amase geeraarka
Murti gaafan, arar lagu gedfoo, gudub u liishaaman
Gundhig hadale, hadaf gobannimoo, gelaya taariikhda
Galayroow adaa goor walbaba, gaawahoow cula’e
Iga gunud warbixin gaaban baan, gudogelaayaaye.
Gabagabo inuu yahay adduun, galabta aan joogno
Oo uu gabaabsaday waqtigu, gebi ahaantiisba
Guud ahaan tilmaan lagu gartaan, gudagelaayaaye
Gacalloow bal eeg xaajadaan, geddisan waa yaabe.
Xiddigaha godkoodiyo rugaha, dib uga guurguurey
Garbihiyo sahriga gooshayee, midibba goor muuqdo
Cirjiirkiyo galgaalka is barkaday, geganahaan dhowray
Saxalkaan gu’ iyo dayr fadhiya, cirir gadaashiisa
Afagaalka dayaxaan golmaray, tiro sagaal gaartey
Naafana galbeed ku la degeye, gudub u weydaartey
Misna dirirka gowraca ka galay, geeddi socodkiisa
Gudcurkaan caddida gaasiriyo, gabbal cadceedeedka
Gelimadaan is ka la guray waqtiga, ka la geddoonaaya
Waa adduun geddii lagu ogaa, guudka loo rogaye
Taa ku garo, geddoon aaqirseben, gebidhaclayntiisa.
Afartaas guddoontaye mid kale, aan ku garansiiyo
Duurjoogna eeg gacaliyow, dhaqan gaddoonkeeda
Gaboodlaha dhurwaagee handadey, gucumalow aarka
Dawacadan gudeysee gundhiday, goosha miraneeysa
Weerkaan gurxamayee shabeel, guudka kaga soohan
Currahaan indhaha giirayee, haramcas goobyaalshey
Gaduudanaha goondhabaya yeey, joogta godadkeeda
Gabsastaan geddiga habardugaag, wada garaafeysay
Waa adduun geddii lagu ogaa, guudka loo rogaye
Taa ku garo, geddoon aaqirseben, gebidhaclayntiisa.
Afartaas guddoontaye mid kale, aan ku garansiiyo
Gugumaha abeesada gigiman, goodka ka eryoodey
Amuurkaan gaboodaya masxoor, ganaya waabaayo
Suuxaanyada ilkaha gororisaye, goodadda maagtay
Abriskaan galaalane gasada, garadaxduu diiddey
Yaxaaskaan galgalateynayee, saynta godanaaya
Bulacaan gafuur laacayee, goowska kaga taagan
Jilbiskaan gabbanaye cidlada, garangar duudduuban
Geel-ururujeeyahan gefyada, ugu garaardaayey
Siilaanyada gargoorkii hantiday, halaq gamaareyda
Waa adduun geddii lagu ogaa, guudka loo rogaye
Taa ku garo, geddoon aaqirseben, gebidhaclayntiisa.
Afartaas guddoontaye mid kale, aan ku garansiiyo
Gorgorkiyo galayrkaan tukuhu, mici gujeeynaayo
Gudurigaan galaayuusayee, habisku guulguuley
Baqalyada gafleeysee jirrida, aayda kaga giigtay
Guumeeyska iyo xiitadaan, ga’masan fiidcawlka
Qoolleyda guuraha mirtaye, digasho goohaysa
Gorayadan cayaartii gableey, gaafka imaanweysey
Galawgaan ku goobeynayee, guuxo tumanaaya
Waa adduun geddii lagu ogaa, guudka loo rogaye
Taa ku garo, geddoon aaqirseben, gebidhaclayntiisa.
Afartaas guddoontaye mid kale, aan ku garansiiyo
Wiyishaan bakaylaha gefrani, geed walba u diidey
Gaaddaweynta jeertee ka biqi, guunka dabagaalle
Maroodigan galliin cabanayee, gacanka laaladshey
Dhidirkaan golxada tooxayee, caro guhaadaaya
Waa adduun geddii lagu ogaa, guudka loo rogaye
Taa ku garo, geddoon aaqirseben, gebidhaclayntiisa.
Afartaas guddoontaye mid kale, aan ku garansiiyo
Gerigaan gandood hoganayee, goodirku hujuumey
Gaashaanlaha biciidkee atoor, geeska ugu faanay
Cawshaan baqada goojisaye, guunyadu eryeyso
Golcastaan gumaadfali ugaar, garabyaweynteeda
Waa adduun geddii lagu ogaa, guudka loo rogaye
Taa ku garo, geddoon aaqirseben, gebidhaclayntiisa.
Afartaas ga’dii ararta iyo, gogoldhig miisaan dheh
Tusaalooyin goosgoosa iyo, guuxi maansada dheh
Guulaamo ay wadato iyo, galangal suugaan dheh
Murti igu garoorton godladey, gayr anoo qaba dheh
Goolgooladkeygiyo GODGODAN, gumacyadeedi dheh
Godol kale, gufaacada labaad, gababacdeedii dheh.
Hal’abuur hadddii loo guntado, gole ka fuulkiisa
Gibbaanadiyo baydgaabku waa, kaa dilaan gabaye
Gurbood garab aleelihina waa, eray gandoobaaye
Nimaan luuqda garanayna waa, gaandhacaa hadale
Gudublool intaan kala gurguray, weedha gucunkeeda
Ma gardaadshey hawraar girgiran, gararna mow yelay
Afar kelena aan goonibaar, garangarshee hooya.
Gaaddiilahaygiyo gabagan, gaylab dhabadkiisa
Galka hogatusaalaha murtida, gadawyalaabkeeda
Gembisada ku gaadaansi xiran, dhirirna gaashaaman
Ha gensado gulaan doobbagoray, saan u giijiyaye
Aan goldooxo goolaaftan kale, gumarna ood jiido.
Maansada adoo gun iyo baar, samo garaabaaya
Haddii aad gabyaayow sarbeeb, saarto gibilkeeda
Macnaheeda gaarkaa halkuu, dhibic gantaalaayo
Gurdanraac xumaan gaalanbaa, kaa gidaadiya’e
Waxse ay gorgoriyaani waa, faallo guudmarane
Bal haddaba anoo guuclihiyo, uur gergereyaasha
Iyo kuwa gunuunuca badane, geddiya suugaanta
Halka ay ka soo gaambiyaan, wada gufeeynaaya
Waxan uga golleyahay murtida, balaan galaalxooro.
Wanaaggaan gawaxayee xumahu, gooba gelinaayo
Gardarrada garbaha nuuxisaye, samida gaameeshay
Dulqaadkaan gayaca yuuraree, kibirku gaaddeeyey
Samirkiyo garaawshaha naxligu, gebengebeynaayo
Daacaddaan garwaaxeedsataye, dhagartu geeseyso
Xushmaddaan gariirtiyo damaca, geedo sare waabtay
Gacaltooyadaan baaqatiyo, gocoshadaan baahdey
Cadligaan galbaday iyo dulmiga, soo guryaha laabtay
Colaaddaan garaaraha ruxiyo, nabaddan guulawdey
Heshiiskaan la gardaduubaye, nacabku goofaarshey
Shakigaan guntiga dhuuqsadiyo, aaminka gedoodey
Goblan tala adduunyada gigtiri, ee garraar furatay
Iyo hawlahaan wada gurrucan, ee golbada yeeshay
Waa gedo la yaabliyo middaan, aragnay goortaane
Waana gabagu tuu gaar ahaan, gooni dhabayaaye
Gundhiggiyo ujeeddada ku xira, gobodu waa taase
Afar kale giraan taa ka culus, hooya galawdeeda.
Runta godashay, ee been gurani, ibo garaacayso
Hubaashaan gardhalatee maladu, gimisha saareyso
Xaqiiqada gondaha laabatiyo, ii dhehdaan guluftey
Xogta gaylabeysiyo dhabtaan, gaaha lagu daahey
Geesaaska baxayiyo rajadan, sii guntima roortay
Saadaasha wada gaagaxdiyo, murugta gowriirta
Waa gedo la yaabliyo middaan, aragnay goortaane
Waana gabagu tuu gaar ahaan, gooni dhabayaaye
Gundhiggiyo ujeeddada ku xira, gobodu waa taase
Afar kale giraan taa ka culus, hooya galawdeeda.
Gartaan odayadeedii dhammaan, laga gayeysiiyey
Gabannadaan ku googgaatamee, gebiga dheer saara
Xaajadaan raggii gaadan jirey, gaarka laga soocay
Gamboorrada guraabaasayee, gorayahoosaadshey
Guddigaan duqow guudcaddiyo, guurti laga reebay
Guumisyadan guddoominahaye, ceebta ka la goosta
Xeerbeegta goobaha shirkii, gole imaanweysey
Iyo gocorradaan geedfadhiga, ganafka taagaaya
Indheergaradka aan gelin tashiye, jiifa gurigiisa
Iyo aragti gaabkaan ra’yiga, hadda gorfeeynaaya
Waa gedo la yaabliyo middaan, aragnay goortaane
Waana gabagu tuu gaar ahaan, gooni dhabayaaye
Gundhiggiyo ujeeddada ku xira, gobodu waa taase
Afar kale giraan taa ka culus, hooya galawdeeda.
Gogoshaan aqoonyahanka guud, gebigi loo diidey
Jaahillada gebranayee hungada, gacantogleynaaya
Codkarkaan caqligu gaamuree, garasha doodaaya
Afgaroocan googgo’a baxshee, guusha ku horqaata
Wacyigaan galiilyoonayee, godob ka soo daaley
Gabgablaha gelgelintii darraad, dib ugu geeddeeya
Gubatada baxaysee goshaas, galangalcayneeysa
Gurya midiglahaan hurinayee, gaararka u faafsha
Nabsigaan guclaha roorayee, soo xargaha goostay
Dadkaan uu galaaftaye mar kale, wada gaggaamaaya
Waa gedo la yaabliyo middaan, aragnay goortaane
Waana gabagu tuu gaar ahaan, gooni dhabayaaye
Gundhiggiyo ujeeddada ku xira, gobodu waa taase
Afar kale giraan taa ka culus, hooya galawdeeda.
Gobannimo waddanigaan rabee, gaylan diriraaya
Gunnimada kuwaan qaayibee, gaadda la hortaagan
Gashigii maqnaa geesigaan, guraya raadkiisa
Doqontaan gumeysigu watee, gaysa xugihiisa
Xornimada go’doontaye sidaas, loogu gododoobey
Gurmadkana dadkii bixinlahaa, lagu gabraaraayo
Geyigaan ka gees iyo ka gees, gabawermee hoogey
Geerigo’anka duulkaan ka dhigay, iyo gabaahiirta
Misna cadaw u googgooynayee, gabaxtan boobaaya
Gollomada dadkaan uga jiree, gadaya beentooda
Oo dhaliisha ay galabsadeen, gibilka saaraaya
Waa gedo la yaabliyo middaan, aragnay goortaane
Waana gabagu tuu gaar ahaan, gooni dhabayaaye
Gundhiggiyo ujeeddada ku xira, gobodu waa taase
Afar kale giraan taa ka culus, hooya galawdeeda.
Waxba gabagu yuu i la gudbine, waxan ku soo gooyey
Guugguulayaashaan hagane, xilalka gaafeysta
Ee hawl middii loo gelbiyo, gudan aqoon waaya
Waxaa gacalayaal goor walbaba, soo gadaalceliya
Ama u ah gabbaad iyo dhufeys, gowsa bahalleeyda
Ama goosatada waayabadan, loo gagabin waayey
Waa gacan shisheeyiyo qabiil, loo gurbaan tumaye
Iyo gurubsi dheefeed caqliga, lagu go’aanshaaye
Waxa gaarhayeen daafacana, maahan gabalkeene
Waa arrin geyaan saan u nahay, aan gudboonahaye.
Hayeshee haddaan soo geddiyo, galalka taariiqda
Ama aan gujiyo dhaqamadii, layska garabdhaafay
Ama sifo dad gudan lagu yiqiin, idin garwaaqsiiyo
Ama aan gagciyo xeerarkaan, oday ka soo gaarey
Ummaddii xishood giiratee, ceeb ka godaneeysa
Ama sharaf gadaal dhowratee, hadaf gobaadeedle
Gu’yaal iyo gu’yaal badan haddii, gaajo ku abaaddo
Amey goomanaadaan muddee, qaar u go’o baahi
Magacooda guunkaa anfaco, lagu garaafeeyo
Iyo gumuro lagu baayacaa, gaabinta hankooda
Kuley xabag garawdiyo cunaan, garas caleentiisa
Gabadano u may qaadan jirin, gunnuda quureede
Dadkaan geeridii dili lahayd, nolol ka goobaaya
Waa gedo la yaabliyo middaan, aragnay goortaane
Ka gilgilo garaad kii lahoow, waan gunaanadaye.
Dhammaad.
September, 2018
Curiye: Abwaan Maxamad Xuseen Faarax
