Gabayga: Godol maal
Gabayga: Godol maal
Gobaa xidid leh, gacal baa leh xigis, gudis abaal baa leh
Gar baa furis leh, geed baa leh tagis, gubasho, ciil baa leh
Jannaa galis leh, Naarbaa leh gubis, godad qabuuraa leh
Xaqaa guul leh, dulmigaa leh godob, gocosha eex baa leh
Gaawaa culis leh, Geenyaa leh qurux, godol irmaan baa leh
Gal baa biya leh, wabi baa gantama, guuxna badahaa leh
Gaajiyo harraad lala galgalan, guri abaar baa leh
Dhulku kala gabiibsane, nimcada gola Shabeellaa leh
Gaalayuuska qeylada colaad, galab dillaacdaa leh
Gugaa di’is leh geedaa leh bixis, geeddi safarbaa leh
Goolaaftan iyo faana, fule gacansarreeyaa leh
Ganacsiyaan gargaar lagu ogeeyn, gaddislayaashaa leh
Genbi-waranka gaashaan la dhigo, geesi diriraa leh
Guryan iyo ganuucan hareyn, gaade doqon baa leh
Gogol loo riyaaqiyo kalgacal, gaari dumar baa leh
Goohiyo xanuun kaa hareeyn, garax jaceeyl baa leh
Galbis iyo gurbaan iyo ciyaar, gabar la hooyaa leh
Gacmaddeeys badweeyn lagu dhaxmaro, gaban dabaashaa leh
Gaadmiyo gadaal leyska dilo, geeysh la jabiyaa leh
Gurmad xumo, gargaar aan la filan, guxush Carbeed baa leh
Gacma dhiig leh, ilmo goowrac iyo, garac Yahuuddaa leh
Garaadkiyo caqliga gaarka, iyo garasha loo aayo
Geesi Ina Hiloowlaa leh iyo gabannadoow joogo.
Ina Hiloowle: Cabdiraxiin Hilowle Galeyr
Curiye: Saciid Muuse (Ustaadka)
