Maansada: “Bilan iyo Buug”
Maansada: “Bilan iyo Buug”
Burdo ruuxa meersaday
Minhaajkana ka soo baxay
Burhaan way u gaartoo
In uu buubo waa gare
Bulbul beena oon jirin
Adoon biririf kaba siin
Amaan boolaxoofteyn
Bishu soonqad weeyoo
Bartankeed la marayee
Horta buuq adoon furin
Ama samaha aan bi’in
Bilaneey sideedaba
Weli buug ma dooddeen
Hadba baalroggiisii
Iyo baababkiisii
Ma bilkayday garashada
Ma ku baahay maankaa
Durba boqol su‘aalood
Ma ku faray birbirintood
Baaraandeggiisiyo
Kala baydgurkiisii
Ma ka baqatay gudashada
Baalba baal ma kuu diray?
Bilaneey aqoon buug
Bilaash qaado maahee
Bugna maaha iyo been
Badankii qoraalkiyo
Waa barasha iyo nolol
Beri hore wixii jirey
Iyo beriga maanta ah
Baab furid wixii iman
Qalin lagu bineeyoo
Lagu beegay garashada
Ayaa lagu balleeyaa.
Bilaneey aqoon buug
Bulxan doodo dhaliyiyo
Mid jacaylka bi‘iyoo
Bugto keena maahoo
Xuma baahsha maahee
Waa bile hannaankiyo
Noloshaba ballaarshoo
Kaa bayrsha hadimada
Iyo boholihii qodan
Kuu bidhaansha guushoo
Kuu fura jid barako leh!
Bilig raac qofkii ahi
Inuu baylah mudanoo
Buur dheer ka dhacayoo
Basanbaasi waa gare
Waadigan babbanayee
Durba baqaha moojee
Noloshii ka baygagay
Buuqu kugu abuurmaye
Yaa bullaanka kugu furey?
Oo beenta kuu dhigay?
Ka ma baaqsan karayee
Bilan waxaan ku weydiin;
Maxaa kuu bidhaamoo
Maxaa halacsi kuu baxay?
Boqol jeer aqoontaan
Buuggeeda lagu noqon
Bilyan jeerna lagu celin
Ama aan burhaanteed
Baaritaanka loo gelin
Beryo badan la dabasocon
Waa ruux bil iyo laba
Raacdo xoola baadiya
Baafinaayey oo kale
Misna baylahdeedii
Barta laga helaayiyo
Berrinkeeda aan jirin
Oo durbaba ka baaqsaday
Dadna baaqa ugu diray:
“Mindhaa bahal ayaa cunay!”
Ee heedheh baayooy
Bilaney waxbarashadu
Waa boqol kun oo jaad
Mar baraha hortiisiyo
Waa buugga iyo qalin
Marna baaris nololeed
Keli baacsi weeyaan
Marna waa bayaannada
Buuniyadu gudbinayaan
Adigoon intaa bogan
Inaad belo abuurtaa
Waa muran billowgiye
Horta yaa ku baaboo
Bilan tuhunka kugu furay?
Hal-adayg birjeexnimo
Burji dumar in uu yahay
Buubbuub nin qabo iyo
Bacowgaan aqoonsane
Horta Bilan ayaad tahay?
Buug aan balaayiyo
Baas iyo abuureyn
Kala bood lammaaniyo
Maandhaaf bulsheed iyo
Baygag iyo xumaanoo
Baalashiisa lagu qoray
Kalgacayl berriinsaday
Boholyowga caashaqa
Iyo sama billowgiis
Anigaa ku barayoo
Baalashiisa furayee
Adigoon isbiimeyn
Oon baqannin gacalooy
Barbarkeyga maad iman
Batarkiyo ciyaaraha
Beerreyda riintiyo
Inan yahay Baloolley
Anigaa ku barayoo
Kuu tumi Bullada ee
Bashiir wuxuu na leeyahay
Baaqaygu wuxuu yahay
Bilaneey abbaayooy
Buur aadan kori karin
Baab aadan furi karin
Iyo bado ha jiirine
Qofku maaha beec iyo
Badeecada dukaan taal
Badankiisa iyo qaab
Bidaar iyo calool iyo
Buurni iyo gaabnida
Iyo dhererka baaciis
Bilan lagama maarmaan
Oo maaha barashadu
Qofka iyo bidhaantii
Ku halbeeg aqoontiyo
Basarkii wanaagliyo
Dhaqan lagu baraaroo
Birmashada tixgelinta leh
Iyo baahi tiriddaa
Dhan kastoo aad birataba
Inuu yahay badbaadiyo
Mid baxnaano kuu gala
Oo baarrinimoloo
Naxariisna beernugul
Oo buuqa necebiyo
Wixii belo abuuraba
Bal ka baar intaasoo
Bilanay xasuusnoow
Xulashada mid baarriya.
Bilaneey isweydii
Boqorkaad sugeysaa
Ma mid bahal ahaayoo
Boob iyo dhib geystoo
Boqol aano galaybaa?
Mise waa mid beeniyo
Ku barbaarey xumahoo
Hablo boqonta gooyee
Abid xile bilaaloo
Bahdiisii ka bayraa?
Ma nin loo bogee gebi
Bulshaduba taqaannoo
Boqol lagu tilmaamo
Samabixiye sharafloo
Bugtadii(aa) daweeyoo
Kii baahan quudshoo
Beeldaaje wacanoo
Nabad uun ku baaqoo
Ka badbaaday xumahoo
Berrin lala galaayo
Baro lala wadaagaa?
Ha ka dhigannin barashada
Xulashada baraaraha
Muxuu beeso lacag iyo
Muxuu baad abuurtoo
Muxuu badar tacbadayoo
Baakaaraha u yaal kayd?
Balse abid isweydii
Muxuu barasho gaar iyo
Bar-aqoon ka qaatoo
Bii hej dii diyaarshoo
Barfasoorna kuba yahay?
Baxaalliga abuur baad
Beryo weheshataayoo
Aad bilaha adag iyo
Dhibka uga baxdaayoo
Beenbeentu abidkeed
Beryo siima joogtee
Runtaa baal u legaddo
Bushigeeda sheegtee
Danta nimaan bareerayn
Bahal adiga kuu daran
Baalkaaga yow gelin!
Bihinbihinta hadalkiyo
Beenbeen u heeskiyo
Boohintaan qalbiga jirin
Bilan yaan lagugu dagin
Bahal adiga kuu daran
Baalkaaga yow gelin!
Baqal faras la daaqdiyo
Badowgii hunguri badan
Hadba tii bidhaantaa
Biligteeda raaciyo
Bilisxaawo bi’isee
Intaan bowda lagu goyn
Oon baahi lagu badin
Bahal adiga kuu daran
Baalkaaga yow gelin!
Bashar wuxuu samaystiyo
Bulsho kale aqoosheed
Adigoon ku baygagin
Uga(u) bogin wax aan jirin
Bahal adiga kuu daran
Baalkaaga yow gelin!
Dhammaad
Curin: maarso, 2024
Bashiir M. Xersi ‘Ina Cubtan’
