Silsiladda; MIDNIMO
Maansada; 2AAD (Leyska dhiib Mareykan)
Maansada (Leyska dhiib Mareykan) Silsiladda Midnimo ee ka socoto Mareegta Laashin.com iyo Golaha Tartanka Suugaanta Soomaaliyeed ayaan kaga qeyb qaadanayaa.
Maansada magaceeda waxaa la yiraa (Leyska dhiib Mareykan) waxeyna ka mid tahay silsiladda MIDNIMO, ahna maansadii labaad, oo jawaabu ah Bashiir M. Xersi oo billaabay silsiladda Midnimo. Maansadu waxay ku billaabatay sidan;
Maansada (Leyska dhiib Mareykan)
Xersiyoow nin maansiyo
Murti loo hibeeyoo
Maareeya gabaygoo
Magac weynla baa too
Anna mudan salaantiyo
Kaa qaaday midigtoo
Madashii abwaankuna
Marxabbeey ku tiriyoo
Waxa loo maqsuudoo
Lagu wada mashquuloo
Dadku magac dhabaayaan
Silsiladdaa MIDNAMA ee
Manfaceedu badanyee
Anna inaan ka miistaa
Hadda maanka galiyoo
Waxaan meeriskow furay
Waa mahadinteedii.
Saddaxdaas mir da’ay iyo
Sidey tahay mayaay roob
Marxabbeeya gobannimo.
Saddax kale macaansada
Maankiyo garaadkiyo
Wey midabba badantee
Iska eega miiddiyo
Murtidiyo tusaalaha.
Nin ragaa maldahayee
Magacsame Bashiirow
Mahadhada sidaaduu
Dadkii wada masaafuriy
Maaltiyo Yugaandhiyo
Madariidya Yurub iyo
Leysu dhiib Mareykane
Madoowgeenna quursada
Manhajkiyo Shareeciyo
Mabda’eenna aan rabin
Neceb mowqifkeennana
Maqribkiyo habeenkiba
Sidii buu madluunyoo
Shacabkii murgaaysnaa
U maroor dillaacaa.
Sidii bey mid dhoofiyo
Midka wali mihii jira
Ey uga madoow dahay
Mijihiyo sidii baa
Madaxoodu xiranyoo
Dadku maahsanyiin badi
Gibi murugta fuushaad
Ka kastaa maqaallada
Lagu qoro mareegyada
Maqrib dumay sidiisii
Noqay majaraheennoo
Mirahii xornimadiyo
Moohir dhalay ma maalnoo
Sidii bey majaaciyo
Macaluul la liitaan
Madaxduna dhargeysaa
Oy macalla yeeshaan
Macawiis dhammaatiyo
Sidii bey maqaar kabo
Dacas malalay qaataan
Madaxduna sidii bey
Labbis muuq leh iyo kabo
Markab loogu keenaa
Oo eey model gaariyo
Dhulka uga mushaaxaan
Maskax iyo aqoon iyo
Caqli laysku miiraa
Noogu soo mitaashoo
Waxad tahay MIDNIMO doon
Anse waa masuugoo
Midowgiyo heshiiskii
Midh ku keeni waynoo
Madaxeynayaashii
Dadku meedalkow xiray
Iyo mudanayaashii
Musuqmaasuq keenen
Mixnad iyo luggooyiyo
Ma hadhey faleenoo
Mushkileey abuureen.
Saddaxdaasi meel dhigo
Saddax kale micnaha fahan
Inta magac qabiil iyo
Jifo leysku maamulo
Dadku milicsanaayaan
Oo leysku maqan yahay
Sidee baa MIDNIMO iyo
Sharaf lagu mataanshiyo
Magac lagu wadaagaa?!
Haddii laba mataanoo
Muha soo godliyay galab
Manfaceeda dhaaydiyo
Iyo xoorti maalnayd
Midi uu macaansado
Amuu malafsigeedii
Kaligii is dhaho maal
Kii kale muraadkiyo
Micnahaa ma galayoo
Dhici meyso mudanow
Inoow kaga maqnaadee
Malag buu ka doortaa
Deetana majiirradii
Iyo muruqi taa xigay
Meerteeyay burahoo
Isagoo maqiiqmaa
Dhulka wuu mab oran jiray
Cidi kama macaashine
Macaluul habeenkaa
Labaduba majaaciyo
Macalluul ku seexdeen
Teennina mirkaan iri
Loogu furay mareegoo
Wali waxa mushkila wado
Oon rabin mushtariggii
Siyaasiga majnuunkee
Haddaan maare lo hayn
Midow iyo sidee baad
Midnimadii ku jirisaa?.
Ani ima mareysoo
Intuu macallin qaa’ina
Mooryaan qabiil liyo
Mintid iyo wadaad iyo
Shacab midi aheeynoo
Mixnad kaba fogaaneyn
Maha lagu kulminayaa
Anna mooyi iga eeg
Ileeyn ima mareeysee
Waxaa loo muddayn jiray
Maqaawiir wax garatiyo
Muslim adiga baa yiri
Anna maragga joogiyo
Kuu ahi marqaatoo
Muran taasi kama oran
Manhajkiyo Shareecada
Rabbi nagu manneystaa
Muslimiinna waan nahay
Ha yeeshee, masiibada
Loo maara waayoo
Maqaawiir u talisiyo
Oday marada tuuriyo
Dhallinyaro mudeysaa
Haddii meeshi laga waa
Sidee baa mushkiladdii
Loo moosi karayaa?.
Ku illoow MIDNIMA taa
Soomaaliyey inaad madal
Masallaha ku hadashoo
Meselada ka dooddoo
Mawqif wada heshiisoo
Isku milanto yaan rabin?
Waa su’aal muhiimoo
Micnaheedu sareyoo
Maskaxdeyda deeqdee
Aan macallinkeygoow
Kaaga naqay mas’aladii
Mahuu nabarku gaaree
Midi lagu asiibee
Mulucleeyo dhiiggii
Haddii marada lagu xiro
Mindhireedka daawiyo
Muray loo walaaqiyo
Meygaagna lagu shubo
Malax kama dhammaatee
Muddo soow in meeshaa
laga dhoowra milicdiyo
Meyriskiyo dhaqniinkiyo
Majaraafin kuma samo?.
Dhammaad.
Curiye: Saciid Muuse Axmad (Ustaadka)
