Maansada: I SU DARAN!
Indhowaydba DEELlEEY
Ma daalacan, ma aan deyin
Ma dallicin, ma dawdabin
Dibnahayga uma furin
Ma haaneedin Dowriyo
Sidigtaydii Dacarreey
Inta deebsho gaawaha
Ma dambarin dambeeddada
Faraskaygi Doollaal
Isna dabarka kama furin
Ha yeeshee, dakaan iyo
Doobba gorayna maan noqon
Durdurkii murtida iyo
Ma da’ gurin xusuustii
Dararkiina maan gabin
Anaa dooq qiyaarkeey
Daaqaddeeda laabaye
Egan dooray maan noqon.
Afartaa da’ iyo woow
Waa dan iska sheeggeey
Kaa degteye, ka digarogo
Mid kalena ku soo durug.
Suugaantu waa degel
Dun xariira weeyaan
Waa derejo qaali ah
Waa waxaan digtor dhigin
Dugsi macallin laga baran
Lagu gadin dukaammada
Dayn amaah dad kuu siin
Dardar lagula soo bixin
Dagaalxoogle lagu dhicin
Dalab kalena lagu helin
Waa deeq Ilaahey
Qofkuu doono siiyaa
Waa dabaqad sare iyo
Dargo hoose dhexe oo
Dadka uma sinnaatee
Sida duunyadoo kale
Ruuxba doobi haystaa.
Mid kalena ku sii daro
Suugaantu waa dawo
Cudurrada dikaamiyo
Lagu duro xanuunnada
Hadday dawga seegtoo
Qalindalab hinnaastana
Sunna wayba daacdaa.
Suugaantu waa danab
Waa qarax dabbaabaad
Dumbuq iyo rasaas iyo
Warmo laysku dooxiyo
Aalad lagu dagaallamo.
Marna waa durraamiyo
Nabad daaddahaysiyo
Dugsi loo hiloobiyo
Wanaag lagu dabaashaa.
Isku duub daliilaha
Suugaantu waa dahab
Iyo dallad ammaanoo
Rabbi kagu duljoogoo
Kagu daba gelaayaa
Haddaad dulum ku hurisana
Dimbiyaal ka dhaxashaa
Haddaad khayr ku dalabtana
Xasanaad ka daahiro
Waa docdaad ka eegtiyo
Hadba daniyo xeeshaa.
Afartaasi waa deleb
Deyr gogoldhig suugaan
Iyo deelka arartee
Iyadana ka digarogo
Mid kalena ku soo durug.
Aan daaro maansada
Dawankiina aan ruxo
Doorbinkii barshiishkana
Diiraddiisa aan saxo
Digba waa digteedee
Aan dubeeyo deelleey
Maruu xalay daruurtiyo
Xidigaha dawaafiyo
Deegaanta daawaday
Diiriye wuxuu yiri:
Alle Daa’im weeyoo
Deeqdiisa hodonkaa
Markii uu isagu dano
Degdegsiimo bixiyee
Inaan kaaga deyriyo
Qorshahayga kuma darin
Ha yeeshee, daraasada
Xilli deban qiyaaseed
Saddex bilo diraaceed
Saxal dirir la xeragalay
Dayax shaniyo tobankii
Naafaha ka dabamaray
Dibbad laba habeenkana
Rugta daalalood degey
Saadaal de’mada roob
Kicin dadab hillaaciyo
Dayr xumaatay ii sheeg?.
Afartaasi waa dood
Waa sarbeeb dalaaliman
Iyadana ka digarogo
Mid kalena ku soo durug.
Dulmigaan dunuub koray
Dulmigaan daguug baxay
Dulmigaan dibbiro karay
Dulmigaan dulmiga dhalay
Halka uu dugsado iyo
Halkuu daaq u doontiyo
Daldaloolladuu galo
Aan ka qaado daahyada
Godob dedan dabool rogo
Mid dahsoon daleed waro
Dadban leexsan daaloco
Dhagar daban dillaaciyo
Dabin xiran dekaan furo
Dammuumane ha eegtoo
Ha ka boodo doqonkuye
Aan dakano xusuusiyo
Waxaan uga dan leeyahay;
Arrintaan dildilodheer
Ee dibqaanta waayadan
Oo daar lagu gufeeyiyio
Loo waayey daadcelin
Halka dalacda laallaad
Dalcad foorar kaga jiro
Ama deridu kaga taal
Aan dibadda soo dhigo
Ha daliigo shacabkuye.
Afartaasna waa derin
Dul ka hooryo maansada
Hordhac loo diyaarshee
Iyadana ka digarogo
Dulucdana ku soo durug.
———————————
Dadweynahakan dood iri,
Dibutaati dood iri,
Dawladdaanna dood iri,
Waxaan iri dadweynaha;
Soomaaliya damiirlaay
Isu daran is duugaay
Dawdaba durduriyaay
Darmad duufwareeraay
Damagsada dayoobaay
Iska dida dareeraay
Nabad dayr ka xooraay
Balaayada daneeyaay
Is dagaala diriraay
Midka dila difaacaay
Ka daryeela dooxaay
Dagaal ooge raacaay
Haldoorkeeda dubataay
Dabadeed dalaabaay
Dawarsiga ku faanaay
Laysku diid is diidaay
Is dulleeya daalaay
Iska daba wareegaay
Caku dawdawdaadiyo
Dareen gaabnidaadiyo
Damac waallidaadee
Illaa daa’im abidkaa
Dulligaan ku haystee
Deegtiyo docaha iyo
Daamankiyo dibnaha iyo
Inta doobta kagu dhegay
Ku dameero dhuujiyey
Mici daqayda kaa suray
Kaa durduurtay dhiiggii
Jiirtaada dalamsadey
Ku del-deley ku dabatiray
Lafahaaga duur qubay
Oo weli dafliyo orod
Ugu jira darxumadaas
Inuu kaaga sii daro
Miyeydnaan ka diireeyn?.
Dacwad kale waxay tahay
Miyeydnaan dareemeeyn
Illaa daa’in abadkiin
Dogobbada magmaaggiyo
Hiishaan digo hulaaqdiyo
Dambaskaad ku gubatiyo
Dabka waayo kugu shidan
Cidda door afuuftee
Dunka cawsya xaabkiyo
Sii dulsaarta damallada
Mahmaah durugsanbaa tiri;
“Duunyadii did moog iyo
Ummaddaan dareen qabin
Daanno kama badbaaddoo
In la dooxo wow halis!”
Dibadyaal Hadraawina
Markii uu duleed iyo
La hadlaayey doqonkii
Dad iyo duunyadiisii
Damdaguugan laga dhigay
Wuxuu yiri; dulmanidaa
Haddana gacan degganidaa
Anna dawgan maantaya
Waxay doodi iga tahay
Dadweynahakan soomaal
Duudsi iyo daraabiyo
Dibindaabyo hoosiyo
Maxaa daqarro lagu dhigay
Haddana diirrimaad iyo
Damqashiyo didmala’aa!
Dawba waa dadkiisiyo
Dhaqan daadahdiisee
Su’aalaha dul iyo hoos
Erayada ku daabacan
Haddii aadan dadweynow
Jawaab deeqda heli karin
Oo dabar go’aagiyo
Daaduunka cararkiyo
Duluglaha saboolkiyo
Doox-dooxa kagu yaal
Garan duulki kagu dhigay
Anaa deexanaayee
Dulka dhegaha ii furo
Illaa sanadkii duumada
Iyo diraacdi Dabadheer
Iyo gugii Dabaaldhiig
Iyo xagaagii Daardhuuq
Iyo dayrtii Dagagara
Iyo dawgan kala guur
Uga dare xil kama degin
Doolaalna muu bixin
Alle dooriyaashiyo
Dooraalayaashii
Wali ways dugsanayaan.
Afartaas ku deeqdaye
Mid kalena ku soo durug.
Waxay doodi leedahay
Duulyohow dammuumani
Daawad Dalawadiinnii
Madidii dambeedda cad
Sidigtii dir Maandeeq
Sidii loogu deeddamay
Ama loo dil qaybsaday
Ama loo dubaax qalay
Ama cadawgu ugu diqay
Daaha aan ka qaadoo
Xaqiiq idin durduurshee
Qof walbow dareenkaa
Adigiyo dadnimadaa.
Iyadoo diraac dhala
Dambarkiina naasaha
Afartuba difqahayaan
Digtatoor lugaha dabar
Dabadhilifna dacayeey
Damagsade middida daab
Dhuunidoon durbaba leged
Dawarsade dibnaha qabay
Damiirxume hunguri daqar
Dibusocod calool doox
Duf ku bexe daqaya siib
Duurgale qoryaha doon
Doogsade dabkii huri
Dabatoob dhardhaar duug
Dagagare digsiga saar
Ducfiliid ku dalaqsii
Dareerleef dabool qaad
Dafaqsade daldalid bixi
Afdabeyl dudummo fuul
Dayday iyo dubaabiyo
Dulli duufka cuna iyo
Doorshaan isugu yeer
Diirte waaxyeheedii.
Afartaa diyaarshaye
Aan tusaale daba dhigo.
Ari jooga deexleey
Iyo doox waqooyaad
Oo duul ilaalshiyo
Aan lahayn dad daajiya
Oo daleed bannaankiyo
Cidlo waayo degeshaday
Ayaa Tuke damaaciyey
Wuxuu dooqaneeyoo
Hadba dacal ka raacoo
Daymada u badiyaba
Dirqin xoog la dibirshiyo
Mici dooxda mooyee
Inaan eegmo dilin arag
Ha yeeshee, shaxbuu degey
Duulimaadna sii haad
Wuxuu sii dafleeyoo
Kaymaha dawaafoo
Hadba geed ku sii dego
Wuxuu soo duljoogsaday
Dunji habar dugaagoo
Ku shiraysa duur howd.
Wuxuu yiri; dugaagoow
Xoolaha dibboodkaa
Oo laayac dalaglaha
Aayda carar dabayshada
Adinkaa daneeyoo
Xuqooqdooda u doodoo
Dugsi nabad gelyale iyo
Daryeel wacan u fidiyee
Dohda bari dalkaa xiga
Duunyadii ku noolayd
Ariba ha u darnaadee
Diqsi iyo duraay iyo
Takar diiranaysiyo
Shillin duudka xagatiyo
Jirri naasa damaq iyo
Dhamiijaa dam siisaye
Gurmad mowgu deeqdaan
Cayayaanka dabarjaray
Ka difaaca daylada.
Qosol diririg badan iyo
Faraxdeeddan dabadeed
Waxay qalin ku duugeen
Ma dakaamihii Weer
In loo diro dalkii bari
Waxay kula dardaarmeen
Dulmadoobe Weeroow
Danaystow duqiiyoow
Doolaala dheeroow
Dafar deris u roonoow
Tukaha dayradiisiyo
Qaylada darxumadiyo
Damqashada xanuunkale
Daah kaama saarroo
Doodda waad maqlaysaa
Adigaa dabriyo orod
Daalaynin socodkoo
Dariiqyada la mara iyo
Dawga kale yaqaannee
Aan kuu ducaynnoo
Derejiyo amaal iyo
Billad dahab ku siinnee
Durba sii kac sii daa
Degdegsiimo sii bood
Daamankaaga kala qaad
Afka laba dabool ka dhig
Deeleeyso miciyaha
Doonka bari ku daayacan
Cayayaanka daashaday
Orodoo ka dabaqabo.
Wuxuu yiri duqii Weer:
Dayrada dalkaas bari
Laga keenay dawgaan
Dugaag aan israacniyo
Dooxataan u waayaye
Illaa daa’in abidkeey
Anigu wow dareenqabay
Sidaas iyo daraaddeed
Doorashada diraalkiyo
Doc codaysigiinniyo
Xilka daacadnimadoo
Dusha iiga tuurteen
Marna diidin mahayoo
Waan aqbalay dabuubtaas
Waxse aan danniyayaa
Arrintaan dul iyo hoos
Dulucdiyo ujeedkeed
Waa dan naga dhexaysee
Adinkuna dadaaloo
Soo diyaar garooboo
Iga daba imaadoo
Dusha iga ilaaliya
Deyrkana ka sii bood.
Wuxuu sii durduriyaba
Markuu gaaray doonkii
Waa dabeecaddiisiyo
Da’dii lagu yaqaannaye
Iska daaq sidii doog
Midba dilay markuu dano.
Daliishiyo tusaalaha
Waxaan uga danleeyahay
Dembi iiga raacayn
Deegaanka soomaal
Dacal iyo illaa dacal
Dadabtiyo dugsiga guri
Iyo dayrka gogoleed
Waxa jiif dangiigsiga
Barkimaha dargaystaye
Dildillaan rogmanayee
Inta daaqay dhaylada
Dhereg daacsanaayee
Loo daddaabo xiran yahay
Dalqaweeyne Aar iyo
Shabeel dool ku yimid iyo
Daan ku guudle Weeriyo
Daacuflihii Dhurwaagiyo
Yeey iyo Dawaco iyo
Sow daadufleey iyo
Dibqalloocyo may aha
Difqinaaya waabaay?!
—————————–
Afartaa ka digarogo
Mid kalena ku soo durug.
Dawlad sheegte waxaan iri:
Duullimaadka dibaddiyo
Damaashaad dalxiis iyo
Hadba dawlad gaarkiyo
Shir u sii dareerkiyo
Soo degtiyo dakayntiyo
Daarta hoos ka xiradkiyo
Derbi ciid ku dhoobkiyo
Difaac yuurar mooyee
Dantii guud xilkeediyo
Aaway dowladnimadii
Sowkan calanki daayacan?.
Afartaa dallaalimay
Mid kalena u daadegay.
Waxay doodi leedahay
Haddii duhur dharaareed
Hoggaan dowladnimo iyo
Dalka dib u dhiskiisiyo
Laydiin doortay howlaha
Waa maxay Denmak iyo
Dalalkaa shisheeyiyo
Shirka dibadda loo tegay?.
Afartaa dallaalimay
Mid kalena u daadegay.
Waxay doodi leedahay
Arrimahaan darjiirkaa
Daguuggiyo duddumintaa
Iska doogsi orodkaa
Is mucaarad dirirkaa
Idaacado ka danankaa
Darandoorri murankaa
Ka dar Dibi dhal hadalkaa
Daawdhaafka qaladkaa
Miyaan sharci daweeyiyo
Xeer lagu dabaaliyo
Dastuur qeexayaa jirin?!
Afartaa dallaalimay
Mid kalena u daadegay.
Waxay doodi leedahay
Haddii aad dagaasheen
Isku duubni wayseen
Misna kala diqooteen
Dawo yeelan wayseen
Iska daba wareegteen
Dulliyohow is doortaa
Oo misana is diidaa.
Waxay doodi leedahay
Dareen oogayaashiyo
Dableeydii hubaysnayd
Ee tobanka dayrood
Iyo sanado lagu daray
Dagaallada qabiillada
Ku danaysan jirayoo
Durbaannada u tumi jirey
Oo dalal shisheetiyo
Afrikaanka deriskaa
Sidii derinti Soodare
Ama dowladdaa Masar
Ama Dooxo iyo Qadar
Ama degelki Eeldoor
Shirka diradiraalaha
Hadba duul u qabanjirey
Maxaad uga duwantihiin?!
Dacwad kale waxay tahay
Dalka qaybi degel degel
Kala daadi gobollada
Degmo degmo u kala goo
Midba dowlad gaariyo
Deegaan u magacaw
Deriskiyo sokeeyaha
Dhalashada durriyaddiyo
Diintaba walaal ku ah
Dudo beelo wada dega
Danwadaata kala sooc
Dirdir laysku laayiyo
Sababeey dagaallada.
Duulyohow dawarayaa
Waxay doodi kugu tiri
Ma dhiigga daadanaayiyo
Maydka wadar la duugiyo
Qaxootiga dagaagiyo
Kuwa duurka tuban iyo
Habaqlaha is daba yaal
Ayaad dabar go’oodiyo
Sii dabaylin raacdada
Dayn ku qaadataanoo
Barakaca dardhoodiyo
Dhaawacaad dullaashaan?!
Afartaa dallaalimay
Mid kalena u daadegay.
Waxay doodi leedahay
Waadinkaan dayooboo
Dariiqii midnimadiyo
Dawgii ka leexdoo
Cidlo damagsanaayoo
Hadba derbi cuskanayoo
Dirgan waayey socodkee
Howshaan idinla daaddaye
Hadba sii dillaantaye
Buuraraha ka degataye
Soo dabaali wayseen
Halka uu daguuggiyo
Deelqaafku uga jiro
Maydnaan dareemine
Ma ogtihiin damanayaal?.
Waxa labada dacal iyo
Daraf iyo illaa daraf
Duluc iyo illaa duud
Duudduub isigu xiray
Dabray xaajadiinnii
Inuu yahay dastuurkaan
Derbiyada shisheeyaha
Lagu soo diyaariyey
Dulka xaasid soo qoray
Dib ka naaxu daabacay
Dhagarqabe ku diirsaday
Iyo khaayin duugane
Maydnaan dareemine
Ma ogtihiin damanayaal?.
Afartaa dallaalimay
Mid kalena u daadegay.
Waxay doodi leedahay
Gumaystahan Dijaalkaa
Doofaar Yuhuudkaa
Doorawayne gaalkaan
Falastiin deldelayee
Ciraaq duullan aadaye
Ka duldhacay Afgaankii
Duqaynaaya Suuriya
Dam ka siiyey Liibiya
Dabka huriyey Yamantii
Isku diray Tuniisiya
Masar duurka wada tubay
Dirqinaaya Suudaan
Dulminaya Marookaan
Eeraan ku dabajira
Dalalkaa Islaamka ah
Wada dooxateeyaye
Ku dabreeyey gebigood
Oo weli dardaarwerin
Daandaansigii wada
Daryel miyaad ka sugataan?.
Waxaan uga danleeyahay
Dowladaha la weeraray
Adoo diin wadaag la ah
Ka xamaasad durug badan
Difaac iyo awood ka yar
Daayacan dhulkaa yahay
Dihan ciidda yuurara
Duruuf baahi dalaglaa
Ogaalkuna dam kaa yahay
Doofilkaan dayuuskaa
Hadduu dagatin kaa helay
Ma ku daysan karayaa
Daacad miyad ka dhowrtaan?.
Daba orod la socoshada
Iyo hiil duggaashigan
Danta aad ka leedihiin
Waan dareemi weynnaye
Na deeqsiiya sheekada?.
——————————–
Afartaa ka digarogo
Mid kalena ku soo durug.
Dibutaati waxaan iri:
Dayrabiga sixirkiyo
Diiwaannada gumaystaha
Kuwa duud xamaalee
Hadba dacal ka rogayee
Ka soo daabacguuriyey
Dabinnada shirqoollada
Ee kala diqoodkiyo
Sumadaha dirsoociyo
Dalka kala jarkiisiyo
Afar delebka qaybtiyo
Feedaraalka dulunkaa
Ku qorqoray dawaaddow
Waxay doodi leedahay
Qalin duurayaashow
Dalamsiga yarkaa iyo
Daqliyaad u xilate’e
Marna miyaad ka doodden
Waxaad daabacaysaan
Amaad daabulaysaan
Duugga nolol dambeetiyo
Dib ka dhaxalka aayaha
Waxay daaci doontoo
Adinkiyo durriyaddiin
Berri degashan doonaan?.
Mahmaah durugsan baa tiri;
“Geelii ay duqdiisii
Duhurkii durdurisaa
Aarankaa ka daranoo
Ku dibbada dafliyo orod”
Waxaan ugu danleyahay
Mar haddii duqowdiyo
Dibutaatiyaashiyo
Madaxdii la doortaba
Illaa sebenki duumada
Iyo waagi dabar furad
Dakanadii qabiilkiyo
Dubaaqooyinkii hore
Dib u soo naqlinayaan
Mooryaan dullowdiyo
Dablay maxad u mooddaa?.
Gaarriyaa dabuub gabay
Deelleey ku soo daray;
“Doqonyohow abtiriyaa
Armaad dogobka qiiqa leh
Derintaad ku jiiftiyo
Dushaada uun ku hurisaa”
Dulucdiyo ujeeddada
Ceelka dowlis dheerkaa
Hoostana duntada ka ah
Wadaamaha daroorta leh
Kuwa doojinaayoow
Codka diilalyadaliyo
Heesta dabacsan maqalnoo
Dhegeheenna kuma duxin.
Ducfiyohow duryamayaa
Waxay doodi kugu tiri:
Nabsi waa madaalee
Dabinnada qayaaniyo
Dalluuntaad qodaysaan
Armaad daqal tiraahdaan.
Mid kalena ku soo durug
Dabuubtii Cabdulle hoo
Deelleey wuxuu yiri;
“Hadallada diciifkaa
Dibbaa loo naqdinayaa
Sheekada ma lagu daray?”.
Mid kalena ku soo durug
Duul hore ayaa yiri:
“Hashu laanta daraygiyo
Doogga muuqda aragtaye
Loollida dahsoon iyo
Dululubada ma ogtahay?”.
Isku duub daliilaha
Dulucdiyo ujeeddada
Waxaan uga danleeyahay
Xaajadan delegantaa
Daacadnimo ka duruggaa
Beenta daabac qoriddaa
Dabci waalli dhaqankaa
Duudsi damac hungurigaa
Daahiil horsocdkaa
Qabiil dabo la geliddaa
Daalinnimo digdigadkaa
Iyo luuqda dalabta leh
Kuwa doobbinaayow
Waxay doodi leedahay
Dacaam sooryo raacde’e
Armaad duumo laacdaan
Cudur daanka gelisaan
Aayihiinna dubataan
Adduunkana dufowdaan
Aaqirana dab mudataan?!
Afartaa dallaalimay
Mid kalena u daadegey.
Waxay doodi leedahay
Allahayow dallaganaa
Caqligooduu dedenaa
Damiirkoodu liitee
Nabad dib u heshiin iyo
Isku dumid rag loo diray
Iyo dowlad qarannimo
Ee dulmiyey dadkoodii
Mar labaadna kala diray
Allahayow ka daranaa
Nin ka duday dalkoo idil
Isku duubnidiisiyo
Dunbuluugle calankiyo
Magicii dir Soomaal
Oo misana ka doorbiday
Degmo maamul gobol iyo
Deegaan xudduudeed
Dagaal oogayaal iyo
Rag dantood u dhaansaday
Deyrlaan u bixiyeen.
Allahayow ka daranaa
Daash qabyaaladeed iyo
Nin qabiil dugsanayoo
Hammi dowladeed qaba
Oo kala diiqid go’idiyo
Dariiq kala xirxirashada
U dabbaaldegahayoo
Farxad iyo damaashaad
Faan la doobbinaayoo
Inuu guul u daaddegay
Isku deexday kaligiis.
Allahayoow ka daranaa
Doollar iyo dacaam soor
Nin la yiri dalkaagii
Hooyoo ku soo dumi
Dabadeedna soo noqo
Aan dullaal ku siinniyo
Daaro aad ku hoyatide
Ee damac hungurigii
Dalkiisii ku doorsaday
Daqli deeq asaaggiis.
Afartaa dallaalimay
Mid kalena u daadegey.
Waa eheb dardaarana
Waa digniin ogeysiis
Waa waano daahira
Iyo kama dambeys hadal
Xil dayece dukaanloow
Haddii aad damiir iyo
Dadnimiyo dux hoosiyo
Damqashiyo dareen iyo
Dhiig dareera leedahay
Haddaad doorashada iyo
Duubka laydin saartiyo
Xilka dowladnimadiyo
Derajada u qalantaan
Haddii aad dar Eebbiyo
Deelkii Qur’aankiyo
Digniintii Rasuulkiyo
Diin Islaam ku dhaqantaan
Qof cuntuu dareensaday
Ama cudurka duraygiyo
Daacuun ku sababsaday
Mar labaad dabiib iyo
Dawo looma siiyoo
Jeenan uma durduurtee
Iimaan diciif yahay
Waxay doodi leedahay
Dambaskiyo dacaradiyo
Dhuunkaasha duban iyo
Dililiqa mariidyada
Eed nagu dalqamisaan
Misna nagu duraysaan
Horeey noo dilootoo
Ku dawoobi maynnoo
Waa dabar go’eennee
Naga daaya sun daratada.
Dacwad kale waxay tahay
Maanta yaan dib loo noqon
Shalay yaan la dabagelin
Darraad yaan la soo celin
Boogihii dawoobiyo
Yaan la riixin daqarrada
Nabarrada damqanayiyo
Yaan la taaban doogaha
Daxashii qabowdiyo
Dacar yaan la soo kicin
Dulmi yaan la dabarfurin
Xaqa yaan la dabamarin
Nabad yaan la dabagurin
Dareen yaan la ololeyn
Belo loo durbaan tumin
Dadka yaan la kala didin
Duul diin wadaagiyo
Waa duriyad walaaloo
Waa dirkii soomaalee
War hooy yaan la kala dilin.
Afartaana daabacay
Mid kalena u daadegay.
Su’aal diirranoo kulul
Aan hordhigo dadweynaha
Lugo nabad ka daal jaban
Dagaalkana durduro xula
Gacmo shaqo dudduuc ka ah
Dawarsina u doog fida
Dhego waano daar cuban
Dulmigana u daahfuran
Indho qayrka laga deday
Balaayadana lagu dayo
Carrab sami damiin ka ah
Xumaantana dunuunuca
Caqli daaman weheshada
Ra’yi gowso deris la ah
Damiir dalqo ku foorara
Xil hunguri ku daabacan
Dibno aan hambaynoo
Af dallacan duggaashada
Qaaxo sii dalooshiyo
Calool aan wax deeqayn
Dub qabiil ku xiran iyo
Hammi dooranuugsiya
Intaas oo dabeecado
Xildhibaan duxlaawaha
Daatadiisu ay tahay
Ma dadbaa ma duunyaa?
Ma duurjoog dugaagbaa?
Ma Daanyeer silloonbaa?
Ma Eey dibad wareegbaa?
Ma Dameer rarooybaa?
Ma Yaxaas af doogtiyo
Dac ku dhuuntayaalbaa?
Ma baqti duugtayaal iyo
Xuunsho xaar daldalataa?
Ma arah dubayo goobtiyo
Doograac hayaanbaa?
Ma madiidin deegiyo
Jundi dawarsanaayaa?
Ma dulli gaajo dilatoo
Nasabkooda doorshaa?
Ma danjire shisheeyiyo
Wax la soo dirsaday baa?
Ma cillanaad dudumayiyo
Jinni midab dad yeeshaa?.
Isku duub su’aalaha
Doorshaanta Yeeydaa
Ficil doogsigoodaan
Ma dareemin aniguye
Duur xulkooda yaa garan?!
Afartaa dallaalimay
Mid kalena u daadegay.
Waxaan dooddi kaga baxay
Awrkii dabarka lagu cunay
Wuxuu dood shallaaytada
Dib u gocashadiisii
Nafta kula dacwiyey ciil;
“Haddaan xarig ku duubnayn
Inaan bahalku dooxeen”
Anna Daahir Caliyoow
Darxumadaan la yaabkale
Waxaa ii diyaafaday
Oo la iigu dawgalay
Amaan sababta daannada
Duudduub u eersiga
Dembi godob u haystaa
Xildhibaan duxlaawaha!
Dhamaad
Axad 30.11.2014
Curiye:
Maxamad Xuseen Faarax
