Maansadan magaceedu waa SAMAWADA, waxaana la curiyey 01. 01. 2016 waa maanso aan ku faalleynayo, sooyaalkii aan soo marney, iyo halka aan maanta joogto, Siiyaalka na sugo, waa maanso koobsanaysa, tagto, joogto , iyo timaadoba, maansadan waxaay saadaalineysaa, in sanadkan cusub ee billowga ah, noqdo, kii bulshada Soomaaliyeed ka samata bixi lahayd dhibaatada.
Abwaaniinta sugan iyo
Hal abuurka sare ee
Seeraha kan joogoow
Suugaantu waa maal
Ninba saami leeyahay
Iyo cood la soofsado.
Qaarbaa simoo dhiga
Siinkiyo madkeedaba
Kuwa waa ku siranyiin
Sawdkeeda maansada
Sees dhigida geeraar
Haddaan seejo marinkeed
Qaldo sadarka jiiftada
Deelqaafka iga saxa.
Aan sugo ujeedkoo
Dulucdana u saabshe
Saadaasha taydaa
Sarta kaaga qaadee
Birta soofe ii mari.
Sooyaal xumaantii
Sannadihi lasoo maray
Sifahaan ahayn iyo
Sulufkii colaadi
Samalhaadku nagu dhacay
Seranseerka iyo hoog
Kuli waan la soconnaa
Sooma noqoto weeyaan
Iyo sayma lagu reeb
God ninkii mar lagu sirey
Sayluhu qaniinyada
Sunta iyo mariidkiyo
Waabey ku sayriyey
Micida sed uga dhigay
Dib inuu u sababsado
Subax kale silici shalay
Dadyoow waa sawaabnimo.
Waxaan uga socda taa
Sannadka aynu joogniyo
Saadaasha aan qabo
Rajadaan sugayaan
Waa seerma weydiyo
Saymo hoorey oo da’ay
Dhulka saacu buuxiyo
Nabad lagu samaadiyo
Nimco aan saluug gelin.
Saxalkiyo dhibkii shalay
Siliciyo dhibaatadi
Suuq la’aanti xoolaha
Sicir bararka quudkiyo
Sahwigii la qaayibay
Sakatiyo colaadii
Siriqdi gumeysiga
Sirta iyo halgaadkii
Iyo suursanaantii
Sanad aan ka gudubno
Saxno qaladki weeyaan
Samo inaan ku waarniyo
Sinnaan iyo midnimo guud
Sanadkeedii weeyaan.
Dalku ciidan suganoo
Saanaddiyo hubkiisiyo
Sawaariikhda duushiyo
Diyaarada sunsumiyo
Sabareyn dabaashiyo
Seeftii dagaalkiyo
Sed wuxuu u yeeshiyo
Saadkiyo gunada iyo
Sabadiyo hoyaadkii
Isu saaran yihiinoo
Wax saluuga lagu arag.
Saraakiil aqoon iyo
Dhamme iyo sarreeya leh
Saantaan hoggaankiyo
Halka ugu sarraysaba
Samir bada rabshoolaha
Xididdada u siiboo
Saanyada cadaawaha
Sahmiyoo xudduudaha
Qaran dhaba salka u dhiga
Muddaan wada sugeynaye
Sahal kaan ku helilayn
Sannadkaani weeyaan.
Sannadkaan bilowgaa ”2016”
Dadku waxay sugayeen
iney sowd la dhiibtaan
Dookhooda seertaan
Hoggaan sugana doortaan
Sidey nagu yiraahdeen.
Sir cad bay ahaydoo
Socon weeysay taasiye
Sifo kale ayaa yimid
Isa seegna na dheer
Weli sahan kalsooni leh
Soomaali may helin
Rag siyaasad wacano
Seebinaaya doonida
Weli sooma ay bixin.
Siinka iyo maansada
Siibad aan u taagoo
Saameelo dulucdee.
Sabadeynu joognaa
Waa jidkii Siraadko
Sarihii fardowsaad
Ninba sahayda tiisa
Soohdimaha ku marayo
Sida biriqda oo kale
Mid u siibanaayiyo
Mid saqlihiyo orodka
Saqaafaha ku mariyiyo
Jilba socod mid jooga
Socodkii la kala badi
Ninba seeri faallee
Soomaalidu sidoo kale
Safka ay gelaysaa
Duunku wada sugaaya.
Sarcadduhu halkuu rabo
Sirgaciyo xumaatada
Kala sibiqsanaantiyo
Seegseega nagu dhacay
Mayska sayrinaayoo
Sareediyo wanaag iyo
Saamax iyo is maqaliyo
Midnimadoo la saabshiyo
Qarannimo ma seesnaa?
Curiye: Bashiir Cali Barre
Ammin: 01. 01. 2016
