GOBANNIMO-(Maanso):
Maansadan GOBANNIMO, waa Maanso guubaabo ah, waxaab tiriyey badhtamihii sanadkii 2008dii, Maansadan oo dadka Soomaaliyeed faraysa inay heshiiyaan oo gacmaha is-qabsadaan, si guudna ugu wada adeegaan qarannimo iyo gobannimo buuxda, maaddaaba; hooyo kasta oo Soomaaliyeed geerida wiilkeeda la-tusay, iyo qax iyo balanbal. Taas oo keentay dhibaato joogta, haddaba waxa waajib ah in barbaartiyo dhallinta baaqigooda hadhay la-badbaadiyo.
Maansadi waxay tidhi:-
In dhowaale Gabay iyo
Gorfaynteeda Suugaan
Gudbintii murtida iyo
Tirintiisa Geeraar
Waa taan ka gaabsaday,
Waxse gooha Maansada
Galabtaygu dhaliyee
Maanta aan u guda galay
Ama uga gol leeyahay,
Gar-naqsiga ujeeddada
Xalay gelin-dhexaadkii
Gaafaha intaan deyey
Keli jiif-galgaladkii
Qaban waayey gogoshoo
ILaa galacdi waabberi
Soo-jeed ku gaadhoo
Gama’ li’ida igu ridey;
Xaajadan guracantee
Kala-gaaf wareegga ah,
Guul-darraanta taalliyo
Gobonnimada dhimatee
Godka hoose lagu ridey,
Gulufkiyo colaadaha
Galabtii timaaddaba
Maxastiyo ma-geynada
Hubka lagu garaaciyo
Gantaalaha sidii nacab
Loo laba-gacmoodshiyo
Lagu tumayo gacalkee
Kala-gaabshey shacabkii
Birtu aanay geyi jirin,
Ayuunbaa gubtaxanyada
gooha iyo taahiyo
Galiilyada i-geliyoo
Guuxaan jiriidkiyo
Gawsaha u kala-furay
Een Gabayga u holladay
Ciil gaaxdey weeyaan!
Ma godladey sidii mayey
Iyo sida gud-gudihii
Geydh iyo ladh soo kaca
Sida jibinta maw ganay!
Gocommaale Aar iyo
Maw reemay sida Goray!
Gedihii abwaankiyo
Raggii gaarka u lahaa
Suugaanta guunka ah
Maw ganay sidoodii!
Geesigii cabdulle iyo
Geedanaar hogtiisii
gedihii Jimcaaliyo
Mawgelbiyey sidii Gacal!
Sida shiikh gadiidkii
Eedaamay Duhur galay
Xaqa inaan la-garab marin
Mawgu goohay Maansada
Ma gorfeeyey xaajada!
Intaan gano sawaariikh
Guud-ahaan dad-weynaha
Debedda iyo gudahaba
Haw gudubto heestani.
Xilka gudasho beeliyo
Arrimahan gar-diidka ah
Gadh-wadeennadeenniyo
Inta garasho dheerbaa
Kolley geli karaysoo
Gedmadkiyo mugdiga jira
Ka gar niqi karaayoo
Sida loo gorfeeyiyo
Sida ay u kala guri
Abwaanka iyo guurtidu
Kama gaabsan doonaan
Inay guudka saaraan
Waajibkooda gaarka ah.
Anna godobta taalliyo
Guul-darrida munaafaqa
Iyo gacan-ku-dhiigluhu
Midho geedo dhabatiyo
Waxay gocondho beereen
Aan goonni sheegoo
Kudka lagu-go’aankiyo
Gawracato iyo Ciin
Waxay gedefka saareen
Aan go’a ka rogo’oo
Gulcubaha tilmaamee
Gobi may maqlaysaa?
Garashada ablowdiyo
Gurraciyo xumaantiyo
Geba-gebada taalliyo
Geeddiga jahligu wado
Mid noo gaara weeyoo
Geeskuba ku caan-baxay.
Dadka kii garaadliyo
Guurtidoo la-laayiyo
Gawraca Or-qaadkiyo
Suxufigoo la-gaadiyo
Marba Geesi noo kaca
Iyo biri ma-geydada
Godka loo banneeyiyo
Odayada gabooboo
Gadhka ciidda loo daro
Iyo gawawar joogto ah,
Gobannimada dhimatiyo
Falka inan-gumeedkiyo
Gefkoo layku raacaa
Midnoo gaara weeyoo
Geeskuba ku caan-baxay.
Ubadkiyo gurboodkoo
Loo gumaado tarab-tarab
Oo godadka lagu guro
goblanka HOOYadeena
Gabaahiirta joogtee
Geeridii ninkeediyo
Gogoshii tacsidu taal
Oo garan wixii diley,
Gooheeda hibashada
ILmadeeda gabax liyo
Garan-waaga yaabka leh
Weli gocashadii hore
Maankeeda kula gigan
Dil wuxuu ku galabsaday
Ee loogu daw galay
Odaygeedi Guuleed,
Goor kale warkaw yimid
Loo sheegay ganatadi
Misna inay dileen Gacal
Wiilkeedi Gaaxnuug
Iyo guri-danbayskii.
Goblan tala adduunyooy!
Gawl lagama waayoo
Ged kastaba ged uun baa
Ka garaadda badatee
Ba’aydeedu Gaasira
Midnoo gaara weeyoo
Geeskuba ku caan-baxay.
Ummadyahaw garaad-xumo
Iyo taliye gocoroo
Ka gabnoobey naxariis
Baa ina go’doonshee
Waa inaynnu garannaa
Inay nabaddu guul iyo
Gogol lagu negaadiyo
Gaaf iyo aroosiyo
Guri lagu nimcaytiyo
Xareed galacle ay tahay.
Waa inaynnu garannaa
Gebi-dhaca colaaddiyo
Gubashada guryaha iyo
Warmahaa la-ganayiyo
Madfaciyo gantaalaa
Dadka lagu garaaciyo
Gefka aad dugsanaysaan
Guntadiinna naar iyo
Cadaab inaad ku gelaysaan.
Gabaldhaciyo waabberi
Goob-yaalka dunidee
Geeddigeeda lagu jiro
Gun-dhiggeedu waa meel,
Halkase guushu ay tahay
Marka laysla garabsado
Gees qudha la-wada maro
Kala gaaf-wareeggana
Layska soo gunaanado,
Gobonnimo dadkaygoow
Waxa gaadhi kara uun
Ummad garashadeediyo
Garaadkeedu wacanyahay,
Guurtida warkeediyo
Gar-yaqaanka raacdoo
Kala-garata samahiyo
Gefka iyo xumaatida.
Gulufkiyo colaadaha
Ummad geed ka fuushoo
Gaadh ka haysa nabaddoo
Ku gadaaman samahay
Gobannimo u qalantaa,
Kuwase geeridiinniyo
Gumaadkiinnasii raba
Inaan weli u guuxdaan
Waydiin garaad-xumo
Iyo gumaro-beelkiin!
Ummadyahay gumaystii
Weli nagama guurine
Isagoo ged kale iyo
Magac gaara yeeshoo
Idiin guud ekaaduu
Gosha iyo hareertiyo
Gondihiinna joogaa,
Idinkuna ma garataan
Gendigaa dushiinniyo
Gadh-wadeenka leexdiyo
Halkuu yool-ku-guur yahay!
Derejiyo garoommiyo
Maskab wuxuu ku gaadhaa
Waa gororka dhiiggiyo
Golfofaha carruurtee
Goor maad dadkaygoow
Kala-garan so’ iyo seed?
Dadka oo la-gaabshoo
Gelin dhexe habeenkii
Gebo-gebo la-geliyaa,
Iyagoon guhaad iyo
Kala-geysanaan iyo
Guluf-weerar qabinoo
Guri nabada joogana
Colaad loo gorfeeyiyo
Godob laguma dhaliyoo
Guul laguma gaadhee,
Ummadyahaw is-garabsoo
Goob qudha isugu taga,
Garnaqsada dhammaantiin
Oo godob dhexdiinniyo
Gef wixii idiin yiil
Diga-xaadh ku gura’oo
Go’aandhaxal galoo adag
Oo laga guurin yeeshoo
Ka xorooba gocorkiyo
Taladiisa gufadhka ah,
Gacmahays qabsada oo
Samahana ku gaardiya.
Waa haddii uu GUULLUHU
GUULLIHIINNA yahay ood
GUULLIHIIN taqaanniin!
Haddii kale gumowde’e
Godka aakhiraad iyo
Cadaab guuna weheshada!
ALLAA MAHAD LEH.
Cabdiraxiim Hilowle (Galayr).
galayr1977@hotmailcom
FIIRO GAAR AH:
Intan danbe ee Maansadu, waa ABHIN, oo dadka ayey abhinaysaa, kuna adkaynaysaa, inay ka fogaadaan wax kasta oo ifka gunnimo iyo guul-darro u hor-seedi kara, iyo wax kasta oo ay cadaabta ku geli lahaayeen ka dib dhimashada. Waxayna la macne tahay:-
Waa hadduu ILaahay
Allihiinna yahay ood
Allihiin taqaanniin.
