Tolow Yaa Furay ?? Q2AAD W/Q: Cabdifataax Xassan Cirguje (Qaran Doon)

quotescover-JPG-13

Tolow Yaa Furay ?? Q1AAD 

Waan yaabay oo amakaagay cabbaar ka dib ayaa waxaan iri sxb marka laga tago inay adduun iyo xaalkiis tahay xoogaa ma iiyar faahfaahin karta dhacdooyinkaaga aan bulshada la wadaagnee?

Waxuuna ku billaabay sidatan Cirgujow mararka qaarkood adigoo cirkaas maraya soo dhawaaq kuuma baxo oo markaad is tiraahdo ka wardoon ma noqdo mid aan kasoo laabasho lahayn, imisaad aragtay dad magac iyo maamuusba ku lahaa bulshada ay la noolaayeen oo intay subax dhaqaaqeen soo noqodku la foolxumaaday ka dib markii mijahoodii madaxa loo rogay?!

Waxaan iri way dhacdaa waxuu misna yiri waa adduun iyo xaalkiisee imisaad se aragtay mid noloshiisii aan rafaad adduunyo soo marin oo markii horeba reer ladan ka dhashay hadana leh hanti u gooniya oo uu ku beec mushtaro dabadeedna subax intuu tashkiiliye xume helay la moodsiiyay inuu waligiiba ciriiri iyo rafaad ku noolaa nolosha runtaana ay yurub taalo, dabadeedna markaas wax kasta oo kashiisa ku jiray daadiyay oo suuqa geeyay hantidii Ilaahay SW siiyayna ku iimaan xumaaday, oo qawaday dabadeedna saas ku xaraashay, teeda kale kaagasii daranee markaasoo kale waxba looma sheegi karo oo waanadaada waxtarba moodi mayo ileen waa nimay bixiso wade, gaajo iyo rafaad aan hayn buu islahaa ka cararee halkaas howl adduunyo ma uga bilaabatay waa “Darxumada xabsiyada, waana silicii saxaraha iyo bahalnimadii badda”. Oon iyo gaajo uusan waligiisba maqal mooyee la kulmin halkaas ma ku bartay, Intaas iyo kuwo kaloo badan waa arrimo u baahan in bulshadeenu ku cibra qaadato.

Waxaan iri gartay balse taadii inoo soo celi, waxuu yiri taydu xoogaa bay ka yara duwantahay kuwaas, Sideed sano ka hor waxaan ku noolaa magaalada Boosaaso xarunta gobolka Bari ahna xarunta ganacsiga Puntland, waa magaalo leh dakad ayna ku xiranyihiin inta badan Soomaalida geesku, waxaan lahaa bakhaar wayn oo aad u camiran suuqiisuna fiicanyahay dakhliga soo galana aad u sareeyo, waxaan haystay macaamil farabadan oo qaarkoodna gobolada dalka gudihiisa xoolaha nool ka keeno qaarkoodna carabta, hanti gaaraysay ilaa Konton kun oo doolar “$50,000” ayaa ku jirtay bakhaarkaas nolosha reerkayguna waxay ahayd mid aad u wanaagsan.

Sanadba sanadka ku xiga waxaa iisoo xaroon jirtay faa’ido aad usaraysa oo marar badan ayaan cidla uga tagay ganacsato xifaaltan iyo tartan adag naga dhexayn jiray illaa markii dambe hankayguba gaaray inaan ku hammiyo amaba hiigsado hoggaan u qabashada ganacsatada gobolka, haayoo waxaan goostay markaan waxii ka dambeeya inaysan jirin cid ila baratami karta sidaa darteedna aynan muhiim ahayn in aan ku habsaamo la tartanka wax ka sokeeya hoggaanka sare.

Waxaan iri haye, waxuu yiri adduunyoy xaalkaa ba! Maxaan been isu sheegay show aniga unbay igu koobnayd riwaayaddaan daawashada qurxoon ma anaa qadartaba talo ku darsaday? Soo tan adduunyadii is badashay maxaan hoggaanka u qabtaa soo anigaan maanta shaahaba qabsan la! Teeda kale Maxay rag aan ogahay oo aan barqooyin hore baabaca ku dhaafay maanta heer gaaray oo la kulankoodu waqti igu qaadanayaa, haday jaanis igu helaana intay gaada ka cayaar iigu yimaadaan xifaaltan igu casayn lahaa si aan kala har lahayn.

Waxaan iri gartay goor muu hadaba xaalku is badalay? Waxuu yiri soo subax anigoo howlahaas adduun kala qorsheenaya oo shaqaaluhuna ku mashquul sanaayeen baabuur raashin iyo hanti kale lagu raraayay hoowshoodana aan korkaa kala socdo la iima soo sheegay Xaawo Luula oo xanuusan dhakhaatiirtii gobolkuna ku taliyeen in dalka dibaddiisa loo qaado, haa waa Xaawo-Luula waa gabar walaashay iga yar ah oo aan inta ila dhalatay ugu jeclaa, haddaan xaafaddii tagay oo aan wax isla gorfeenayna mid dhaqaale iyo mid ciidanba iiga fursan wayday inaan noqdo qofka inanta aaney ka maarmin ee u qaaddaya  dalka Itoobiya si dhakhaatiirta waddankaas loogu soo dabiibo. Walaalkay iga yar oo aan waxbarashadiisa darteed hawshaas uga turnay ayaan masuuliyaddii bakhaarka hawshiisii ku wareejiyay halkaasna waxaan tabaabushadeedii ka galnay socdaalkii noloshayda wajiga cusub uyeelay, waxaad moodaa in subaxdaa la i kab tuuray oo la iga daba yiri “soco oo hasoo noqon!”

Waxaan iri Maxaad ulajeedaa weedhaas? Waxuuna yiri Adaa fahmi doonee aan kuu dhameeyo sheekada…………….

Dhamaad Qaybtii 2aad, Lasoco Qaybta xigta………………….

W.Q. Cabdifataax Xasan Cirguje (Qarandoon)

Cirguje1986@gmail.com

SHEEKOOYIN

Cart
  • No products in the cart.